Jornalista Jaime Pires / Editór Noémio Falcão
Dili (Timor Post)—Ema na’in-lima idade mesak joven mate bainhira ho família ba hariis tasi hodi festeza simu tinan foun 2022 iha Binagua-Postu Administrativu Laga, Munisípiu Baukau, iha loron Domingu 02/01/2022.
Matebian sira kompostu husi mane na’in-ida no feto na’in-4. Sira hotu família uma lisan-ida de’it, husi Suku Guruka, Postu Administrativu Kelikai, Munisípiu Bauaku.
Komadante Polísia Nasionál Timor-Leste (PNTL), Munisípiu Baukau, Superentendente Xefe António de Sá hatete, vitíma na’in-lima hetan hotu ona maibé ho kondisaun mate.
“Sira ba peknik iha tasi ibun Binagua Postu Administrativu Laga nian, no dadaun ne’e ita hetan hotu ona maibé ho kondisaun mate,” Komandante António ba Jornalista sira via telefone dehan Nia bá jornalista sira liuhusi viatelefone, Domingu (03/01/2022) lokraik ne’e.
Akontesimentu ne’e maizumenus tuku tolu lorokraik. Hafoin hetan mate-isin lori kedas ba ospital refereal Baukau molok entrega ba família hodi haloot.
Enkuantu tuir informasaun ne’ebé mak Timor Post rekolla husi Komunidade iha Binagua ne’ebé salva vitíma sira ne’e katak ema na’in-6 mak mout, feto na’in haat ho mane na’in ida mak hetan ho kondisaun mate, no feto na’in ida mak sei grave hela dadaun ne’e lori ona bá Hospital Referal Bauaku.
749 total views, 3 views today
Bele hare Video Seluk :