BAUKAU, (timorpost.com)— Komunidade aldeia Uatubala, suku Uailili, postu administrativu Baukau, munisípiu Baukau preokupa ho atitude xefe aldeia sesante tanba deskonfia estraga pipa bee-moos tanba la re-eleitu ba xefe aldeia Uatubala iha eleisaun suku 2023 liubá.
Komunidade, Eldino Enrique Freitas, hatete triste tebes tanba bee-moos ne’ebé lorloron komunidade kuaze uma-kain 40 resin konsumu ne’e sempre ema taa kotu, tanba ne’e nia reprezenta komunidade uma-kain 40 resin ne’e husu ba parte kompetente liuliu parte seguransa atu investiga xefe aldeia sesante, Sidónio Mário Freitas, tanba nia radik deklara iha públiku katak bainhira nia laliu eleisaun ba xefe aldeia mak nia sei taka bee-moos ba komunidade uma-kain 40 ne’e.
“Nia hatete iha públiku ne’eba dehan katak bainhira imi la hili ha’u (xefe aldeia sesante) mak ha’u sei taka bee-moos ne’ebé mak ha’u-nia mandatu ha’u dada ba imi ne’e, ninia liafuan ne’e ami komunidade hotu-hotu rona, ami hanoin nia ko’alia halimar maibé liu de’it loron ida bee-moos ne’ebé ami konsumu ne’e ema estraga duni”, Eldino Enrique Freitas, haktuir ba Timor Post, Kinta, (28/03).
Nia hatutan, xefe aldeia sesante ne’e husu ba komunidade atu buka fali bee seluk hodi dada tanba bee ne’ebé komunidade mota sorin konsumu ne’e xefe aldeia sesante nia mandatu mak dada ba, nu’udar komunidade la simu atetudi xefe aldeia sesante nian ne’e tanba hamatekomunidade tanba bee ne’ebé komunidade konsumu ne’e bee-moos.
“Agora ami konsumu de’it bee-mota, bainhira udan boot mota tun bee-moos laiha ona tanba bee-matan ami la hetan ona, bee-moos ne’e mak ami konsumu maibé esteaga hela de’it”, nia salienta.
Akontesementu taa kotu pipa ne’e la’os dala ida de’it, beiebik ona, tanba ne’e ami komunidade sente triste no lamentável tebes ba hahalok ne’ebé mak xefe aldeia sesante halo ba ami komunidade Uatubala, hahalok brutalízmu sira hanesan ne’e ami komuidade sai vítima no susar tebes atu hetan bee-moos, liuliu ami ne’ebé idade liu tia ona tanba forsa laiha atu kuru bee ho distánsia ne’ebé dook.
Tanba ne’e, nia husu ba parte relevante imediata bolu lalais xefe aldeia sesante Sidónio Mário Freitas, atu rezolve aktu brutalízmu ne’ebé mak nia halo, tanba akontese beibeik ona, karik autoridade lokál sira labele rezolve komuidade ne’ebé sai vítima prontu ona atu lori kazu ne’e ba oin.
Entretantu, delegadu aldeia Uatubala, Mário Hipolito Soares, rekoiñese aktu ne’ebé xefe aldeia sesante halo tanba momentu primeru akontesementu, xefe aldeia sesante nia oan rasik hasoru ona delegadu hodi deklara no rekoiñese nia aman rasik mak taa kotu pipa tanba la re-eleitu ba xefe aldeia.
“Nia oan rasik hasoru ha’u iha kalan boot jam 10 hodi hatete katak hahalok ne’ebé mak ha’u-nia aman halo, tanba ne’e ha’u fó hatene ba delegadu katak, pipa ne’ebé mak ha’u-nia aman taa kotu aban ha’u hola foun fali, tanba ne’e ha’u husu ba imi hamutuk ho ha’u para ita hadi’a estrgus sira ne’ebé mak iha, no iha momentu ne’e nia promete ba ha’u katak nia aman sei la estraga tan, maibé realidade sei hakontese nafatin”, delegadu informa ba Timor Post iha aldeia Uatubala.
Delegadu ne’e informa, xefe suku Uailili, Hernani de Jesus Arauzo Ribeiro, rasik halo ona mediasaun, bolu ona xefe aldeia sesante hodi fó hatene atu labele estraga tan pipa bee-moos refere tanba komunidade husi mota sorin presiza tebes bee-moos, maibé aktu hirak ne’e kontinua akontese.
“Ha’u haree ferik katuas mak barak, no ha’u sente triste liu tanba tempu udan laiha bee-moos no bee-matan protezidu ida iha ne’e para populasaun sira atu konsumu lorloron, maibé iha ne’e komunidade nia sorin-sorin ne’e mesak mota de’it, entaun sira susar tebes atu konsumu bee-moos”, nia esplika.
Nia hatutan, “Akontese tiha hanesan ne’e entaun komnidade iha ne’e lorloron mak konsumu de’it bee-mota, maibé tempu udan bee ne’ebé mak sira konsumu ne’e bele mós prezudika ba sira-nia saúde tamba bee-merak”.
Tanba ne’e, delegadu ne’e hatete daudauk ne’e presiza troka de’it pipa ne’ebé iha tanba pipa kotu att hotu ona, tutan labele ona, karik bele uza de’it besi tanba pipa ne’e fásil ema atu estraga.
Pipa bee-moos ne’ebé estragus ne’e konsumu husi komunidade aldeia Uatubala ne’ebé hela iha área Sortui
Pipa refere taa kotu primeiru iha loron 30 fulan-Outubru 2023, no iha tinan 2023 taa kotu pipa dala-3, iha 2024 akontese ne’e, iha loron 25 marsu liubá.(*)
6,501 total views, 3 views today
Bele hare Video Seluk :
Subscribe to Timorpost
