MANUFAHI (timorpost.com) — Deskonfia funsionáriu permanente ho inisíal JPX no LCI husi serbisu Diresaun Nasionál Transporte Terestre (DNTT), munisípiu Manufahi deskonfia pratika mal administrasaun iha serbisu fatin.
Komandante Komandu Polisia Munisípiu Manufahi, Superintendente Joni Viana das Regras, hatete funsionáriu na’in-rua ne’e pratika mal administrasaun iha serbisu fatin no ida ne’e submete ona ba Ministériu Públiku (MP) iha Tribunal Distrital Suai hodi hein akuzasaun.
“Kazu ne’e kona-ba falsifikasaun dokumentu ka mal administrasaun, bainhira ema balun ba trata dokumentu tuir loloos osan ne’ebé fó ba DNTT ne’e tenke lori mai selu iha Banku Nasionál Komérsiu Timor Leste (BNCTL) sukursál Same, maibé realidade ema balun la lori osan mai hatama”, dehan komandante Joni iha nia kna’ar fatin Same, Kinta (23/02/2023).
Tuir nia, situasaun ne’e kategoria abuzu de podér au-mézmu tempu hanesan falsifika dokumentu ne’ebé autoridade sira lahatene.
“Oknum na’in rua ne’e nu’udar funsionáriu permanente iha DNTT Manufahi, kazu ne’e iha ona Tribunal Suai ne’ebé iha ona akuzasaun husi Ministériu no sira hein tempu badak ba kumpre akuzasaun ida ne’e”, komandante hakotu.
Sikun seluk hatán ba kestaun ne’e Diretór Diresaun Nasionál Transporte Terrestre (DNTT), munisípiu Manufahi, Faustinho Soares, konfirma ba kestaun ne’e hanesan foin deskonfia.
“Ha’u hanoin ida ne’e foin deskonfia dehan funsionáriu na’in rua komete mal administrasaun, no deskonfia ne’e dala-ruma tebes, dala-ruma lae”, dehan Faustinho.
Diretór ne’e dehan, bainhira sei iha deskonfia ne’e tama ba iha prosesu ruma mak foin deside tanba deskonfia ne’e sempre no iha ne’ebé de’it.
“Deskonfia ne’e iha ne’ebé de’it, maibé ita hein ninia prosesu ne’e la’o ba mak ita haree ninia serteza ne’e iha ne’ebé, maibé karik iha deskonfia tenke hatudu faktu” nia hakotu.
2,223 total views, 3 views today
