DILI, (timorpost.com)— Governu Kuba liuhosi Ministériu Juventude no Desportu Kuba ho Ministériu Juventude, Desportu, Arte no Kultura Timor-Leste (SJDAK) halo diskusaun hodi hametin kooperasaun iha área oioin.
“Iha tinan 2024 ha’u hasoru embaixadór na’in-2, tanba de’it programa ida ne’ebé servisu hamutuk iha mós programa kooperasaun bilaterál iha programa oioin. Programa arte kultura nian, ne’ebé ita sei prepara timoroan sira ne’ebé atu aprende ba halo formasaun liután kona-ba arte kultura intermus músika, dansa no buat seluk tan iha tempu balun, iha tinan hirak liubá ita pernah iha estudante lubuk ida, ne’ebé iha ne’eba aprende no balun fila ona, sira husi arte kultura no agora ita hakarak kontinua tan, tanba ita planu ba oin ne’e ita sei iha akademia múzika no asuntu biblioteka nasionál nian, tanba ne’e ita presiza rekursu ne’ebé natón”, Ministru Juventude Desportu, Arte no Kultura (MJDAK), Nelio Isaac Sarmento, informa ba jornalista iha nia kna’ar fatin, Lesidere, Sesta, (05/01).
Nia hatutan, iha oportunidade ne’e ko’alia mós kona-ba desportu tanba iha tinan rua ba kotuk Governu liuhosi Sekretáriu Estadu Juventude no Desportu (SEJD) servisu hamutuk ho Kuba lori profesór espesialista sira husi Kuba hanorin estudante Fakuldade Desportu iha Universidade Nasionál Timor-Lorosa’e (UNTL).
“Durante sira prezensa iha ne’e, ita-boot sira hatene foin lalais iha Wisuda estudante kuaze 50 resin ona ne’ebé hetan ona lisensiatura, sira ne’e mak atu sai futuru profesór desportu ba eskola sira hotu. Portantu ida-ne’e seidauk to’o, entaun ita presiza tan, ne’e mak ita husu nafatin kooperasaun atu kontinua hodi matein nafatin sira-nia profesór sira ne’e iha neeba,”dehan nia.
Nia hatutan “Ita-boot sira hatene, desportu la’os atu hetan prestasaun, maibé ita orienta ona ita-nia populasaun ambitu ho atividade desportiva hodi kuidadu saúde, tanba ita-boot sira hatene iha tinan hirak ba kotuk ne’e ho prezensa profesór Kuba sira nian, ho ita-nia avo sira no ema ne’ebé tensaun aas ho atividade terapi ne’ebé sira halo bele hatún sira-nia moras lubuk ida. Tanba ne’e oportunidade Embaixadór Kuba mai iha ne’e, ami halo diskusaun ami hetan ona ideia balun, atu la’o ba oin, ami husu mós ba ita jornalista sira hodi oinsá hamutuk fó informasun klaru ba ita-nia populasaun atu mellora sira-nia kondisaun no saúde liuhosi atividade desportiva”.
Governante ne’e esplika, durante proifesór Kubanu sira iha Timor la’os hanorin de’it iha universidade maibé ajuda Ministériu Juventude Desportu halo planu estratéjiku oinsá halo atividade jinástika hanesan desportu ida ba komunidade.
Ministru ne’e mós husu ba jornalista, durante Kumanu sira iha Timor, nu’udar aproveitamentu di’ak tebes, no povu timor presiza hatene prezensa Kubanu sira-nian.
Iha fatin hanesan Embaixadora Kuba mai Timor-Leste, Grisel Alina Aldama Inniss, hatete, Governu Kuba no Governu Timor-Leste sei kontinua kooperasaun ne’ebé iha, tanba ne’e, enkontru ohin husi Embaixadora ho MJDAK ne’e halo revizaun ba kooperasaun bileterál ne’ebé mak Governu Kuba iha ho Governu Timor-Leste.
“Ita konsidera mós sua eselénsia iha ajenda no planu ne’ebé barak maibé embaixadora ho Governu Kuba konvoka hela sua eselénsia ba iha konvokatóriu ba joven nian ne’ebé sei hala’o husi Kuba, oinsá Kuba atu mostra ba ita Timor oinsá sira hala’o sira-nia marsa ho joven sira”,dehan Embaixadora ne’e.
Nia haktuir, kona-ba arte no kultura iha ona planu atu asina nota intendimentu iha tempu besik no estudante sira ne’ebé uluk hala’o sira-nia estadu iha Kuba sei iha nével médiu, tanba ne’e iha ona prinsípiu atu kontinua sira-nia mehi superiór nian.(*)
3,654 total views, 39 views today
Bele hare Video Seluk :
Subscribe to Timorpost
