DILI, (timorpost.com)– Verónica Sipa ho idade tinan 19, husi Oekusi hakotu iis iha Hospitál Nasionál Guidu Valadares (HNGV) tanba pozitivu virus Rabies ka moras ne’ebé bele halo transmisaun husi asu ba ema bainhira asu ne’ebé afetadu husi virus refere tata ema.
Matebian Verónica konfirma asu tata nia iha Pásabe iha fulan-Dezembru tinan 2023 liubá foin mak hatudu sintoma virus Rabies nian horseik mak transfere husi Hospitál Teferál Oekusi mai HNGV para kontinua halo tratamentu maibé la konsege salva vida, no pasiente ohin loraik hakotu iis iha HNGV ho pozitivu virus Rabies.
Tuir família matebian, Zita informa ba Timor Post foin dadauk (22/03) katak matebian Verónica ne’e asu tata iha fulan-Dezembru 2023 liubá.
“Asu tata nia ne’e, sira nia asu hakiak duni mak tata nia iha liman karuk”, Nia informa ba Timor Post, ohin kalan Sesta, (22/03).
Nia esplika, durante ne’e asu tata tiha nia la sente moras, maibé asu ida tata nia mak mate kedas, entaun iha fulan-Marsu tinan ne’e mak nia foin sente moras ne’e, entaun durante fulan-Marsu ne’e nia komesa moras ona, no doutór sira haruka nia baixa iha hospitál, tanba asu nia sintomas foin maka hatudu.
“Ho ida-ne’e, mak iha fulan ne’e nia baixa iha hospitál Referál Oekusi, entaun iha horseik loron 21 fulan-Marsu mak transfere mai iha Hospitál Nasionál Guidu Valadares, maibé ohin loraik ne’e estudante Verónica hakotu ona iis iha HNGV”, família matebian ne’e konta tuir.
Matebian Verónica daudauk ne’e hala’o hela nia estudu iha Eskola Tékniku Vokasionál Oekusi, matebian hhusi postu administrativu Pásabe, RAEOA.(*)
45,036 total views, 60 views today
Bele hare Video Seluk :
Subscribe to Timorpost
