DILI, (timorpost.com)— Konselleru Másimu partidu Khunto, José do Santos ‘Naimori’, hatete nia sei la hamonu governasaun ne’ebé lidera husi Primeiru Ministru (PM), Kay Rala Xanana Gusmão, tanba formasaun Governu Konstitusionál da-IX ne’e rezultadu husi eleisaun parlamentár iha 2023 liuba.
Tanba ne’e, Khunto nia pozisaun ba governu atuál mak ne’e hanesan jerasaun foun tenke estuda buat ne’ebé loos, labele sai inimigu iha polítiku.
“Uluk bainhira maun bo’ot Xanana ho maun Taur Matan Ruak iha diverjénsia polítika, ha’u hatete ha’u sei la hamonu maun Taur Matan Ruak iha VIII Governu, no agora iha IX Governu Konstituisionál mós ha’u sei la hamonu maun Xanana Gusmão, tanba ita presiza Estadu ida ne’ebé maduru atu tau-matan ba povu tanba povu maka hili no fó fiar liuhosi eleisaun ida”, Naimori informa ba jornalista sira hafoin remata enkontru ho Prezidente Repúblika, José Ramos Horta, iha Palásiu Prezidensiál, Bairru-Pité, Kinta, (21/03).
Entretantu, durante enkontru Xefe Estadu husu hanoin Xefe Estadu oinsá mak partidu Khunto bele kria pás no estabilidade iha rai ida-ne’e.
“Ohin hamutuk ho Vise Prezidente no Adjuntu Sekretariu Jerál, hamutuk ho konselleru mai hasoru Prezidente Repúblika atu husu hanoin ruma oinsá atu bele kria pás iha rai ida-ne’e, harii unidade nasionál ida entre polítiku na’in sira no presiza rona husi Xefe Estadu atu hotu-hotu bele kompriende saida mak polítika, oinsá atu asegura, Estadu ida presiza lideransa hotu-hotu iha unidade, nune’e Governu ne’ebé ukun bele iha planu ida ne’ebé di’ak ba futuru”, Naimori hatete.
Nia hatutan, “Ita nu’udar polítiku tenke kria pás la’os de’it hanoin ita-nia ambisaun partidu nian maibé tenke iha sentidu Estadu hodi kontribui ba rai ne’e ho di’ak, tanba ida-ne’e povu nian”.
Nia haktuir, Prezidente Repúblika hanesan Xefe Estadu nasaun ida-ne’e nian no iha matenek no koñesimentu ne’ebé bo’ot teb-tebes no sai mós autór ba nasaun ida-ne’e, hotu-hotu presiza rona nia hodi hamutuk kontribui ba dezenvolvimentu nasionál.(*)
23,145 total views, 12 views today
Bele hare Video Seluk :
Subscribe to Timorpost
