DILI (timorpost.com)—Ministériu Asuntu Kombatente Libertasaun Nasionál (MACLN) hamutuk ho Konsellu Kombatente Libertasaun Nasionál (CCLN) sei halo verifikasaun ba dadus veteranu iha loron 28 Setembru 2023.
“Validasaun dadus 2º rejistu 2009 kontinua fali ona iha loron 28 fulan Setembru tinan 2023 ba munisípiu no Postu Administrativu hotu, tuir kalendáriu ne’ebé determina ona,” Ministru MACLN, Gil da Costa “Oan Soru” hatete liuhosi Konferénsia Imprensa, iha Salaun CCLN Komoro, Kinta-Feira (21/09/2023).
Oan Soru haktuir, kalendáriu no lista naran validasaun ikus ida ne’e sei taka iha sede munisipál CCLN ida-idak, no lista ida ne’e mosu de’it rejistu husi ema ne’ebé sidauk hala’o validasaun dadus partisipasaun iha funu ba ema ne’ebé validade tiha ona.
Ministru ne’e hatete, ba kombatente sira hotu-hotu seidauk valida tenke hakbesik ba ekipa validasaun no aprezenta kartaun eleitorál iha momentu valida dadus.
Karik la marka prezensa iha oportunidade ikus liu ida ne’e, MACLN sei konsidera rejistu hanesan exclude.
Programa validasaun hahú iha tinan 2019 no valida tiha ona iha territóriu tomak hamutuk 93.946 rejistu (75,3%), no iha previzaun atu validasaun 29 rejistu remata iha fulan Novembru husi tinan ida ne’e.
Durasaun validasaun ba munisípiu ida-idak la hanesan tanba depende númeru rejistu atu valida, tanba validasaun sei hala’o iha Postu Administrativu CLN ida-idak nia moris fatin.
Gil hatete, bainhira ekipa remata verifikasaun sei taka lista kada munisípiu ida-idak.
“Tanba ne’e veteranu sira-ne’ebé seidauk halo verifikasaun hakbesik aan ba sentru CCLN munisípiu sira atu nune’e ekipa bele halo verifikasaun no sira ne’ebé verifika ona hein pagamentu de’it”. Nia haktuir.
Nia dehan, sira-ne’ebé rejista liuhusi Komite 12 de Novembru no partisipa iha Manifestasaun 12 Novembru, Komité rasik mak valida tuir kalendáriu ne’ebé mak sei determina liuhusi Komité 12 Novembru ne’e kolaborasaun ho MACLN.
Entretantu, total veteranu iha territóriu nasionál hamutuk 124.782, ne’ebé válidu hamutuk 93.946 atinje ona porsentu 75. Sira ne’ebé seidauk halo verifikasaun total hamutuk 30.838.
6,506 total views, 9 views today
Bele hare Video Seluk :
Subscribe to Timorpost
