Baukau(timorpost.com)—Ministériu Agrikultura Pekuária Peska no Floresta (MAPPF) servisu hamutuk ho Food and Agriculture Organization (FAO) iha Timor Leste Implementa projetu OSRO ne’ebé finansia hosi USAID hodi introdús Climatic Sensivel Agriculture (CSA) no Conservation Agriculture (CA) ba agrikultór sira iha Aldeia Makadae, Suku Triloka, Postu Administrativu Baukau Vila.
Tuir reprezentante FAO, Paula Lopes da Cruz, hatete, MAPPF-FAO servisu hamutuk halo atividade konservasaun ne’e liuhosi demonstrasaun roling hodi hamate lehe ne’ebé Agrikultór sira antes ne’e kuda atu habokur nutrisaun iha rai laran, tanba lehe ne’ebé kuda hamate duut boot sira no hamahon, inklui hametin rai hodi garantia rai nia kualidade, konservasaun, habokur rai atu hasae produsaun ai han lokál.
“Objetivu ita implementa atividade kuda lehe ne’e hanesan parte ida atu hasae produsaun rai laran tanba lehe fó nutrisaun di’ak ba rai hodi garante produsaun bele aumenta dupla, atividade ne’e demonstrasaun servisu ba ita nia Agrikultór sira kona-ba Conservation Agriculture (CA) hanesan saida maka pratika daudaun tratór hamate lehe iha toos laran atu nune’e lehe bele mate dodok habokur rai”, Paula Lopes da Cruz, informa ba Timor Post, iha Baukau, Sesta (16/02).
Nia afirma, atividade kuda lehe nia funsaun atu habokur rai, tanba ne’e bainhira Agrikultór sira atu kuda ai-horis la presiza fila rai, maibé direita kuda lehe ne’e nia funsaun maka atu aumenta produsaun.
“Durante ne’e ita koko ona sira ne’ebé kuda lehe bainhira kuda ai-horis seluk rezultadu kolleita dobru no sira ne’ebé la uza lehe produsaun menus”, nia lembra.
Iha fatin hanesan reprezentante Diretór Nasionál Estensionista Agrikula no Formasaun, Januário Marçal sente kontente no apresia ba komunidade suku Triloka, tanba simu ona métodu di’ak hosi Ajénsia Internasionál Food and Agriculture Organization iha Timor-Leste hodi kuda lehe atu habokur rai hodi hasae produsaun.
“Ha’u apresia tebes ba ita nia komunidade Suku Triloka, tanba sira simu ona métodu ida ne’e hosi ita nia Ajénsia internasionál FAO iha Timor Leste atu kuda lehe, nune’e hodi habokur sira nia rai no oinsá atu hasae produsaun hodi fa’an iha merkadu inklui atu apoiu programa merenda eskolár nian”, Januário haktuir.
Entretantu reprezenta Agrikultór Suku Triloka, Helder da Silva Guterres, hatete, lehe hanesan estrume ne’ebé di’ak hodi konserva rai, halo rai sai bokur inklui halo redusaun ba ema atu halo servisu hodi hamoos to’os, tanba nia parte aplika ona programa kuda lehe iha nia to’os ikus mai fó rezultadu pozitivu.
“Vantajen hosi kuda lehe ne’e ha’u mak koko ona iha tinan kotuk fó benefísiu barak mai ita, ida fó estrume ne’ebé di’ak, konserva rai, halo rai sai bokur, depois ita la uza ema barak atu servisu hamoos toos”, nia lembra.
Reprezentante PAM Baukau, Maria Celestina Viegas, hatete hahú hosi tinan 2016 autoridade munisípiu Baukau rejista ona ajénsia internasionál no nasionál hamutuk haat nulu resin, tanba ne’e hanesan reprezentante PAM Baukau kontinua nafatin husu apoiu ba komunidade agrikultór sira, liu-liu ajénsia FAO atu kontinua fó apoiu kona-ba nutrisaun nian.
“Ita iha autoridade Baukau Ita iha ajénsia lubuk ida, daudaun ne’e ami rejista hela ajénsia 43 tantu internasionál no nasionál ne’ebé servisu hamutuk ho autoridade Munisípiu Baukau hahú 2016 to’o mai agora, tanba ne’e hanesan autoridade munisipál Baukau hakaruk no husu nafatin ba iha ajénsia sira hotu”, nia Apela.
Programa CA implementa ona iha munisípiu 10 kompostu hosi munisípiu Baukau, Manatutu, Manufahi, Lospalos, Bobonaru, Aileu, Ainaru, Kovalima, Ermera no Likisá, enkuantu Dili, Ataúru no Oekusi la implementa.
4,317 total views, 3 views today
Bele hare Video Seluk :
Subscribe to Timorpost
