(Reportajen Jaime Pires/Editor Mateus da Cruz)
Dili (Timor Post) – Membru Polisia hosi Unidade Patrullamentu Fronteira (UPF) hamutuk ho Batallaun Orden Públiku (BOP), kaptura joven na’in-4, tanba halo tranzasaun ilegál sigarru marka Surya 12 no pohon sagu karton haat iha fronteira Terrestre entre Timor-Leste ho Indonézia, iha Suku Holsa, Postu Administrativu Maliana, Munisípiu Bobonaru.
“Loos duni katak hafoin ita simu informasaun hosi Servisu Sekreta ita halo operasaun hamutuk no iha loron domingu tuku lima dadeer ne’e ita konsege kaptura sidadaun timoroan mane na’in haat hosi Suku Saburai,” dehan Komandante BOM Munisípiu Bobonaru, Inspetór Xefe, Rozalino Dos Santos via telefone, Domingu (10/04).
Nia dehan, sidadaun sira ne’e kompostu hosi AE (20), FB (25), ODS (26) no EDL (24). Polisia sira kaptura sidadaun sira ne’e iha área foho leten Suku Holsa bainhira hakat tama ilegál hosi Indonézia mai iha Suku Saburai ne’ebé besik kedas area fronteira Indonézia nian.
“agora daudaun joven na’in-4 hamutuk ho evidénsia motor-4 ne’e entrega ona ba Komandu PNTL Munisípiu Bobonaru hodi submete ba prosesu identifikasaun no kontinua foti medida halo investigasaun hodi prosesa tuir lei.
Atu hakotu nia subliña, daudaun ne’e nia parte nafatin orienta membru sira servisu sekreta atu servisu maka’as prevene tranzasaun ilegál ho motivu droga ne’ebé tama mai Timor-Leste liuhusi fronteira inklui kontra bandu sira ne’ebé bele fó prejuizu ba estadu.
“Ami simu orientasaun hosi Komandante UEP atribui mai ami atu nafatin servisu hamutuk apoiu UPF kontinua halo operasaun hodi kontrola rigorozu liña fronteira tanba oras ne’e daudaun ita iha hela faze kampaña eleisaun prezidensiál nian”, deklara.(Lee notisia seluk iha Timor Post/Asesu You Tube Timor post)
639 total views, 3 views today
