Baukau(timorpost.com)—Reitór Institutu Superior Cristal (ISC-sigla portugés), Sebastião Pereira, bandu estudante foun tinan akadémiku 2024, hodi labele utiliza atributu arte marsiál iha kampus ISC Polo munisípiu Baukau.
Edukadór ne’e husu ba estudante foun tinan akadémika 2024, liuliu estudante hirak ne’ebé maka envolve iha Grupu Arte Marsiál, labele lori arte marsiais mai Kampus. ISC hanorin ema atu sai sidadaun no sarani ne’ebé di’ak, tuir lema Padrueiru São João Bosco nian.
“Ita iha ne’e so iha de’it maka pas no estabilidade, se maka tama arte marsiais husi munisípiu Vikeke no Postu Administrativu Venilale, molok tama iha kampus ISC soe hela iha area Uailili ne’ebá. ISC polo Baukau ita ida de’it, se maka diresaun husi Lanud nian, tama arte marsiais husik hela iha ne’ebá, husi vila antiga mós husik iha ne’ebá, estudante sira ne’ebé husi Laga, Baguia husik hela iha Buruma ne’ebá, iha ne’e buat sira violénsia labele akontese iha ita nia kampus, iha ne’e sai ida de’it, hotu-hotu iha ne’e eskola salezianu nian,” Sebastião deklara hafoin abertura orientasaun ba estudante foun iha Kampus ISC Polo Baukau, Kuarta (21/2).
Kuandu tama ona iha ne’e sai ona antigu alunu João Bosco, labele hirus malu, labele baku malu, iha ne’e dosente sira mós labele fó presaun ba estudante, labele baku, labele siak no labele hakilar.
Tanba ema dehan violénsia ne’e maka baku ema ne’e labele akontese, ida maka presaun psikolojia, dosente sira haree estudante la hatene, hanorin sira, komu la hatene ne’e maka mai eskola, se matenek ona iha uma la presiza mai eskola.
“Ita nia Institutu ne’e ita nia padrueiru São João Bosco, sei akompaña ita ho ita nia Inan Nossa Senhora Auxiliadora Cristão akompaña ita boot sira para Eskola mós sempre susesu, dixiplina tempu antes minutu 15 hothotu iha ona aula kampu nian”, nia husu.
Tanba dixiplina maka xave ba susesu estudante ida-idak, liuliu estudante ne’ebé maka hakarak atu alkansa objetivu estudu iha Kampus ISC Polo Baukau. Estudante foun sira presiza estuda didi’ak, atu bele sai ema kualidade ba família no nasaun.
3,813 total views, 3 views today
Bele hare Video Seluk :
Subscribe to Timorpost
