DILI, (timorpost) – Kazu vítima, Antoneto Sarmento, ne’ebé deskonfia hetan tiru husi intelijénsia forsa armanda iha suku Gariuai, postu administrativu Baukau vila, munisípiu Baukau, tuir Fundasaun Mahein laiha serteza tanba Polísia Nasionál Timor-Leste (PNTL) seidauk iha informasaun ba públiku kona-ba autór ba kazu refere.
“Deskofia membru forsa armada mak tiru joven iha Baukau ou lae?, ne’e deskonfiansa, mais laiha serteza, atu serteza tenke investigasaun. Ami-nia rekomendasaun ba momentu ne’ebá kedas see mak atu halo investigasaun, polísia mak hetan mandadu legál para atu halo investigasaun ba kazu ida-ne’e, to’o agora ita seidauk hetan autór, ida-ne’e ita la hatene tanba saida?”, Diretór FM, Nelson Belo, informa ba Timor Post iha nia kna’ar fatin, edifísiu FM, Gricenford, Kinta, (23/11/2023).
Tuir FM, loloos autór presiza halo investigasaun tanba kazu ne’e krime, hakanek sidadaun joven ida, tanba ne’e, hafoin akontesimentu ne’e FM rekomenda Komandu PNTL munisípiu Baukau mak halo inestigasaun maibé to’o agora seidauk halo deskobrimentu ba autór ne’ebé tiru joven refere.
Husi inserteza ne’e públiku menus informasaun kona-ba kazu refere, dala-barak falla iha investigasaun. Nune’e mós informasaun ne’ebé espalla iha públiku katak deskonfia membru forsa armada mak tiru joven ne’e mós seidauk serteza.
“Ita menus informasaun tanba ita-nia rekursu uamanus ne’e menus, liuliu ba área intelijénsia, área analiza kazu ne’e mak sei menus entaun ladauk hetan autór ba kazu ne’e. Kuandu iha investigasaun depois submete ona ba prosesu Tribunál desizaun tuun ona, entaun nia (membru forsa armada) ne’e sala, maibé hanesan ne’e ita deskonfiansa de’it, ne’e ita presiza investigasaun”, nia hatete.
Maske nune’e, FM rasik seidauk hatene loos involvementu ba kazu ne’e autór husi forsa ka polísia tanba instituisaun ne’ebé kaer kilat mak instituisaun FALINTIL Forsa Armada Timor-Leste (F-FDTL) no PNTL rasik tanba ne’e iha prosesu investigasaun mak bele identifika loloos.
Bainhira iha membru husi instituisaun rua ne’e mak komete mak sei iha sasaun rua, ida bele hetan sasaun krime no sasaun administrativa husi instituisaun pertense tanba instituisaun iha regra interna rasik.
Antes ne’e, Komandante Operasionál Interiña Komandu Jerál PNTL, Superintendente Xefe Polísia Natércia Eufrázia Martins, kazu tiru joven iha suku Gariuai, munisípiu Baukau, ne’ebé deskonfia involve husi intelijénsia forsa armada daudauk ne’e PNTL munisípiu Baukau halo ona investigasaun no entrega ona ba Ministériu Públiku (MP) hodi hala’o prosesu kontinuasaun.(*)
3,462 total views, 3 views today
Bele hare Video Seluk :
Subscribe to Timorpost
