DILI, (timorpost.com)— Provedoria Direitu Humanu no Justisa (PDHJ) kontinu fó formasaun ba Polísia Nasionál Timor-Leste (PNTL) liuhosi Unidade Batallaun Orden Públiku (BOP) kona-ba kna’ar no respeita direitu humanu ba membru membru PNTL ho tema “Hala’o Kna’ar Tenke Respeita no Proteje Direitu Humanu”.
Provedór PDHJ, Virgílio da Silva Guterres ‘Lamukan’, informa formasaun ne’e kontinuasaun progrma ne’ebé PDHJ halo durante tinan barak, liuliu hahú kooperasaun PNTL.
“Agora, tinan foun ne’e ami hahú halo fila-fali, halo formasaun ba BOP, hanesan baibain barak liu kona-ba ita-nia polísia hala’o sira-nia kna’ar hodi respeita direitu humanu, hodi hakruk no respeita sira-nia kódigu profesionál”, Lamukan informa ba jornalista sira iha salaun BOP Kaikoli, Segunda, (19/02).
Nia dehan, formasaun ne’e ko’alia barak liu oinsá atu haree intervensaun tuir artigu 147, pontu 2 ne’ebé hatete prevensaun krime ne’e tenke halo bazeia direitu humanu.
“ohin, ha’u hatete ita tau alzema, ita kaer, ita silu ne’e dalaruma parte husi prosesu averiguasaun ninian, mais ita hatama tiha iha alzema hatama tiha iha sela depois ita tuir ba baku, tebe ida-ne’e parte ida violasaun direitu humanu. Entaun sira ne’e mak provedór halo kooperasaun ho sentru formasaun PNTL no mós unidade asesoria direitu umanu nia”, dehan nia.
Iha fatin hanesan Representa Komandante Jerál PNTL, Albino Mauzino, sente previleizu boot ida, tanba bele hetan formasaun direita husi PDHJ ne’ebé mak forma maluk sira iha Unidade Espesiál iha BOP.
“Ami sente orgollu ho formasaun ida-ne’e tanba aprofunda liután koñesementu ba membru Polísia Nasionál Timor-Leste sira”, dehan nia.
Hanesan Xefe Departementu Formasaun buka nafatin kooperasaun ho entidade hotu-hotu ne’ebé mak iha hanoin atu halo formasaun ba PNTL iha teritóriu nasionál, nune’e PNTL iha koñesimentu kle’an kona-ba lei no mós ezerse sira-nia funsaun hanesan ajente polísia ne’ebé profisionál no respeita lei no respeitu ema-nia direitu.
Partisipa iha formasaun ne’e husi Unidade Espesiál hamutu na’in-25, feto na’in-2 no mane na’in-23, husi formandu sira ne’e na’in-2 mak sei sai fali formadór hodi fó fali trainamentu ba membru BOP ne’ebé seidauk hetan oportunidade hodi tuir formasaun refere.
Enkuantu formasaun primeiru faze ne’e hala’o ho durasaun loron 5, no formasaun ne’e la’os foun, maibé tinan-tinan sempre realiza. Membru PNTL nafatin hetan treinamentu atu nune’e bele reflete fila-fali matéria treinentu sira ne’ebé hetan ona.(*)
2,940 total views, 42 views today
Bele hare Video Seluk :
Subscribe to Timorpost
