DILI (timorpost.com)—Diretora Eskola EBC Faról, Filomena Freitas hatete daudauk ne’e eskola preokupa tebes ho limitasaun manorin prejudika tebes ba prosesu aprendizajen estudante sira nian iha Eskola Bázika Sentrál (EBC) Faról. Eskola EBC Faról agora iha profesór ho kategoria permanente 59 no EBC Faról akumula estudante hamutuk 2.157.
“Hanesan dirijente iha eskola ne’e sente preokupa no triste tanba menus profesór prejudika tebes ba prosesu aprendizajen alunu sira nian iha sala de aula. Uluk iha profesór kontratadu nain rua (2) maibé tuir dekretu lei ne’ebé anunsia husi Ministra Edukasaun hapara sira kontratu ho ida ne’e matéria sira ne’ebé durante ne’e sira assume tenke paradu”. Diretora EBC Faról, Filomena Freitas, hateten ba Timor post iha servisu fatin Faról, Kuarta (08/05/2024).
Dirijente eskola ne’e haktuir, iha Eskola Bázika Central Faról iha 35 salas, nune’e mós sala sira ne’e la to’o ba professores ho 59 grau kategoria permanente atu prienxe hotu sala sira ne’e.
Ho ida ne’e mak dirijente eskola Faról foti desizaun ba profesór sira ne’ebé hanorin iha loraik ba turma 9 ano, 8 ano,1 ano ho 3 ano sira tenke tama dadersan no iha parte lokraik sira tenke tama hanorin fali ba iha 7 ano, 6 ano,5 ano no 4 ano hodi prenxe aula ne’ebé mamuk.
Problema seluk ne’ebé eskola ne’e rasik hasoru mak mobiliáriu eskolár ne’ebé seidauk kompletu hodi tau iha sala aula sira, inklui mós profesór ne’ebé menus bele prienxe fali atu, nune’e bele kontinua prosesu aprendizajen ba estudante sira no prepara mós uniforme ba estudante sira.
Ho desizaun ne’ebé maka ministériu hasai ona maka ba nesesidade eskola nian inklui ba falta profesór no laiha uniforme ba estudante sira ne’e sei toma responsabilidade husi Ministériu Edukasaun. Nune’e dirijente eskola ne’e fiar katak problema sira ne’e eskola Faról enfrenta bele hetan resposta husi ministériu.
EBC Faról akumula estudante hamutuk 2.157 no presiza iha koordenasaun ida di’ak bainhira implementa merenda eskolár ne’e.
Iha programa IX Governu nian atu implementa refeisaun manas ba alunu sira ne’e no ne’e tenke bazeia duni ba ai-han nutritivu no variedade, nune’e alunu sira bele konsumu ho di’ak hodi bele ajuda sira partisipa iha sala aula ho di’ak liután.
Programa Merenda Eskolár nu’udar subsídiu ne’ebé fó iha ámbitu asaun sosiál eskolár, ne’ebé ho objetivu hodi asegura direitu han loroloron ho hahán saudável, ekilibrada no indispensavel ba dezenvolvimentu no insentiva partisipasaun labarik sira iha edukasaun pré-eskola no iha ensinu báziku, públiku no partikulár hodi integra ba rede públika ne’ebé situa iha rai-laran hodi promove ninia prosesu ensinu no aprendizajen.
1,275 total views, 42 views today
Bele hare Video Seluk :