DILI (timorpost.com)—Reprezentante Povu iha Uma Fukun Parlamentu Nasionál Husu Polísia Siéntifika Invetigasaun Kriminál (PCIC-sigla portugés), atu halo investigasaun ba ID Facebook ne’ebé fó sai informasaun la respeita ema nia dignidade.
Informasaun ida ne’e Deputada Bankada CNRT, Maria Barreto, levanta iha reuniaun plenária PN, relasiona Públika mídia sosiál facebook ba foto ho Inan-feto, Rosa Cardoso, ne’ebé partus iha varanda Postu Saúde Barique, Postu Administrativu Natarbora, Munisípiu Manatutu.
“Ha’u hakarak atu husu ba PSIK atu halo investigasaun ba ID sira ne’ebé maka gosta públika ema iha situasaun ida ne’ebé mak tuir loloos ita respeita standard operasionál prosedur pesoál saúde no pasiente ninian”, Deputada, Maria, hato’o lamentasaun.
Reprezentante Povu ne’e hatete, informasaun ne’ebé públika iha mídia sosiál ne’e la loos, tanba parteira iha hodi atende ba preokupasaun husi família liuliu inan feto ne’e partus iha varanda postu saúde nian.
“Sira ba duni parteira, parteira dehan imi ba uluk mak ha’u tuir, too mai kala minutu-rua ka tolu nia partu iha varanda, ida atende ne’e parteira mak atende duni. Tuir loloos ita hotu asegura privasidade pasiente ninian, labele públika situasaun ke inan ka aman ruma nia kondisaun hanesan ne’e”, nia hateten.
Iha fatin hanesan Deputadu Gabriel Soares, lamenta ho atitude husi ID facebook ida ho naran Ivonio Jose, ne’ebé la respeita dignidade inan-feto bainhira partus hela.
“Ha’u hakfodak ID ida naran, Ivonio Jose, brani kolu molik ita-nia inan feto ne’ebé partus iha mídia sosiál,” Deputada Bankada CNRT ne’e afirma.
Tanba ne’e, nia husu ba públiku atu públika situasaun sira hanesan ne’e iha média sosiál tenke ho dignidade nu’udar umanu, liuliu nu’udar inan ida bainhira hala’o hela partus iha situasaun difisil nia laran.
Entretantu, kazu ne’e akontese iha Postu Saúde Barique, Postu Administrativu Natarbora, Munisípiu Manatutu, iha loron 25 fulan Fevereiru tinan ne’e.
1,494 total views, 3 views today
Bele hare Video Seluk :
Subscribe to Timorpost
