DILI, (timorpost.com)— Diretora ezekutiva (Fokupers), Maria Fátima Pereira, halo lansamentu ba relatóriu avaliasaun kona-ba mekanizmu referál violénsia bazeia ba jéneru iha eskola no prosesu fila hikas ba eskola.
Lansamentu ne’e hanesan pasu ida ba oin husi esforsu ne’ebé durante ne’e Fokupers hamutuk ho parséiru importante sira hanesan membru referál, entaun sosiedade sívil halo advokasia hela oinsá atu bele iha polítika fila hikas ba eskola.
“Liuliu iha parte eskola nian, mekanizmu ida ne’ebé própriu hodi bele apoiu no mós halo atendimentu ba iha kanorin sira, liuliu feto no labarik sira ne’ebé sai vítima violénsia bazeia ba jéneru. Parte ba ida-ne’e refere liubá iha violénsia seksuál no mós abuzu seksuál, tanba ida-ne’e lori tempu barak loos ona, ita luta hamutuk lei violénsia doméstika, infelizmente polítika fila hikas ba eskola ida-ne’e sei nafatin polítika konsidera hanesan polítika orál”, dehan Diretora ezekutiva Fokupers, Maria Fátima Pereira, hato’o asuntu ne’e ba jornalista sira iha City8, Elisa Beth Room Manleuanna, Segunda, (26/02).
Tanba ne’e, Fokupers nafatin hamutuk ho parséiru sira kontinua luta oinsá mak bele fasilita vítima violénsia bazeia ba jéneru hodi fila hikas ba eskola.
Enkuantu representante UNFPA, Domingas Bernando, hatete, atu integra programa boot ida-ne’e atu bele fó koñesimentu di’ak liu ba labarik feto no mane sira, iha idade reprodutiva, entaun ita tenke integra kurrikullu nasionál kona-ba saúde seksuál no reprodutiva kompresivu. Ne’e la’os ko’alia de’it kona-ba anatómika maibé oinsá labarik sira bele koñese sira-nia-an, tanba sira-nia isin sira iha direitu tenke hatene funsaun órgaun sira iha isin.
“Koñesimentu ne’ebé kle’an entaun sira bele proteje sira-nia-an, ha’u hanoin iha saúde seksuál reprodutiva ne’ebé mak komprensivu ne’e iha laran, la’os de’it biolojia no anatónika maibée oinsá atu hanoin proteje sira-nia-an”, nia esplika.
Nia hatutan, bainhira labarik feto sira iha koñesimentu kle’an mak sira bele proteje sira-nia-an.(*)
2,820 total views, 3 views today
Bele hare Video Seluk :
Subscribe to Timorpost
