DILI (Timorpost.com)—Alegasaun final husi Ministériu Públiku (MP) husu Tribunal Judisiál Primeira Instánsia Dili (TJPID) aplika medida prizaun preventiva ba arguido inisiál AMV ne’ebé bosok ema hetan osan liu-husi publika ema nia video.
Iha prosesu primeiru interrogatóriu Tribunal Dili konsege rona ona deklarasaun hosi arguido ne’ebé bosok timoroan husi video call hodi hetan osan.
Enkuantu liga ba prosesu interrogatóriu ne’e defeza ba arguidu defensór públiku, Marçal Mascarinhas hatete iha alegasaun Ministériu Públiku liu husi prokuradór Antonio Tavares husu ba Tribunal aplika medida koasaun prizaun preventiva ba arguido inisiál AMV.
Entretantu parte defeza konkorda alegasaun Ministériu Públiku nian.
“Kazu ne’e lohi ema sira video call molik, ameasa ema lakohi fó osan atu publika video iha media sosiál, ne’e konfesa hotu ba Juiz”, dehan Defeza arguido, Defensór Públiku, Marçal Mascarinhas ba Jornalista sira iha Tribunal Dili, Sesta-Feira (14/09/2023).
Nia afirma, pozisaun defensór ne’e agora prizaun preventiva nian, hein prosesu investigasaun depois julgamentu mak tetu, tanba defensór la’ós atu defende ema. Arguidu ne’e bosok ema barak ona.
Hafoin rona tiha parte rua, tribunal deside adia hikas desizaun despaxu ikus ba loron aban, 16 Setembru 2023 haleu tuku 10:00 OTL.
“Aban kontinua desizaun final. Tanba arguidu komete kazu furtu agravadu no burla agravadu bosok foti ema nia osan iha money Gram ne’e foti dala tolu ona ho montante dollar Amerikanu 2.844 USD, primeiru dollar Amerikanu 2.000 USD, segundu 450 USD no ikus dollar Amerikanu 514 USD”, katak nia.
Portantu, arguidu ho naran inisiál AMV ho idade 29 orijen husi Munisípiu Ermera, Postu Admimistrativu Atsabe, Suku Obulo, Aldeia Atu Barak, antes ne’e ekipa PNTL halo kapturasaun iha Banku Western Union iha area Timor Plaza, Postu Administrativu Dom Aleixu, Munisípiu Dili.
Iha audiénsia primeira interrogatóriu ne’e, prezide hosi Juiz Turnu, Afonso Carmona, Ministériu Públiku reprezenta hosi prokuradór, Antonio Tavares, arguidu hetan asisténsia hosi defensór públiku Marçal Mascarinhas.
2,574 total views, 3 views today
Bele hare Video Seluk :
Subscribe to Timorpost
