DILI (timorpost.com) – Relasiona ho notifikasaun husi Tribunál iha loron Sesta (11/11), hodi hasai obrigatóriu inan faluk Verónica Xavier ho nia oan no mós nia Bei-oan João ne’ebé foin halo semana ida, daudaun ne’e provizóriu hela ho viziñu sira, tanba seidauk hetan fatin.
Inan Faluk Verónica, hato’o lia hirak ne’e ba Media online Timor Post iha Bedois, Suku Kamea, Postu Administrativu Kristu Rei, Munisípiu Dili, Domingu (13/11).
“Bazeia ba Notifikasaun husi Tribunál katak, iha loron Sesta (11/11), hodi hasai ami obrigatoriumente, tanba dehan rai ne’e Senhor Alexandre dos Santos, mak manan ona rai ne’ebé ami hela ba ne’e, tan ne’e, daudaun ha’u ho ha’u-nia Bei-oan ne’ebé foin halo semana ida ne’e, provizóriu hela ho viziñu ne’ebé besik ami-nia hela fatin,” nia dehan.
Nia dehan, momentu hasai sira obrigatóriu ne’e, Deputadu Bankada Khunto, Luis Riberto ho Prezidente Komisaun A, Joaquin do Santo no Alvogadu to’o iha terenu halo intervensaun, dehan provizóriu hela iha uma ne’e, hafoin kontinua nia prosesu, maibé sira la konsege uza uma ne’e, tanba parte husi Tribunál dehan banhira sira uza tenke husu lisensa.
“Momentu ita-nia Na’i-ulun ho Advogadu sira ko’alia dehan, ami bele uza uma hodi Toba, maibé fita ne’e mak la bele halo kotu, mais iha Sábadu (12/11), dadersan parte husi Tribunál to’o iha fatin refere hodi dehan, ami la bele uza uma ne’e, ema ruma mate iha laran mós sei hasai, tanba ne’e ami muda sai ami-nia sasán ne’ebé fakar ba,” nia haktuir.
Nune’e, iha Sábadu kalan sira atu deskansa, tanba ne’e iha viziñu balun hanesan estudante mak bolu inan faluk Verónica ho nia Bei-oan João, atu provizóriu hela ho sira, maibé ba inan faluk Verónica Xavier, nia oan sira kontinua Toba iha li’ur.
“Ha’u-nia Bei-oan João, durante loron rua ne’e kondisaun di’ak, maibé fatin atu deskansa ka atu Toba ne’ebá ladún saudavel, tanba kalan Malirin no susuk barak,” nia konta.
Nune’e mós nia dehan, maski provizoriu hela ho ema, maibé dala-ruma mós sente la di’ak, entaun nia sai mai deskansa ho nia oan sira iha lona okos.
“Horisehik parte husi Parlamentu Foin Sae, mak mai fó apoiu lona tolu ba ami hodi uza ba Toba no hodi taka ba ami-nia sasán sira ne’ebé iha li’ur,” nia hakotu.
Alende ne’e Inan faluk Verónica nia oan feto, Joana de Jesus, sente triste los, tanba Segunda nia oan sira atu ezame mak kadernu sira aat hotu kedas, tanba rai de’it iha udan laran.
“Ha’u sente triste los, tanba aban ami-nia oan sira atu ezame mak ami-nia oan sira kadernu aat hotu, sira la estuda tanba kadernu aat hotu kedas,” nia lamenta.
Nia dehan, agora sira hela iha li’ur, iha lona okos de’it, sente la hakmatek tanba Toba iha li’ur de’it, bebe ho sira-nia inan faluk ne’e mak Toba ho viziñu iha uma laran, maibé uza de’it sala mak Toba ba.
“Ha’u hanesan nia oan feto ami sente triste, tanba ne’e ami hakarak husu ba boot sira atu rezolve ami-nia problema ne’e para ami mós bele hetan fatin mahon di’ak para ami bele hela, sátan ami ho bebé kondisaun ki’ik hela, tanba bebé foin mak semana ida ohin, nia moris iha loron (06/11),” nia hateten.
Ikus liu nia aprezenta, parte husi ONG Redi ba Rai, mak oferese Advogadu nain-rua, atu nune’e sira mós bele prosesa kazu ne’e.
2,065 total views, 3 views today
Bele hare Video Seluk :
Subscribe to Timorpost
