Dili (timorpost.com) – Organizasaun Fokupers realiza Semináriu ba iha nivel munisípiu no nasionál ho tema “Kria koneksaun ho parseiru importante sira husi Governu, emprezáriu no mós sosiedade sivíl”, hodi hakbiit ekonomia sobrevivente no vítima sira ne’ebé re-integra ona.
“Ohin ami realiza Semináriu ho objetivu atu promove inkluzaun sosiál no mós dezenvolve ekonomia feto sobrevivente violénsia bazeia ba jéneru iha Timor Leste”, Diretora Fokupers, Maria Perreira Guterres, informa iha Salaun Fokupers, Faról, Kuarta (19/10).
Programa reforsa hamutuk nu’udar projetu ba fulan 30, ne’ebé implementa husi Fokupers no mós ACBIT no hetan finanseiru husi Uniaun Europeia.
Projetu ne’e dezeña atu kompleta inisiativa sira iha prevensaun, hakbiit ekonomia feto sobrevivente, asesu ba justisa no mós advokasia.
Programa reforsa hamutuk kobre munisípiu hitu (7), Likisá, Ermera, Manufahi, Ainaru, Baukau, RAEOA no mós Dili.
“Atividade ne’e save ida husi programa reforsa hamutuk maka hala’o Semanáriu iha nivel munisípiu nasionál ho tema “Kria koneksaun ho parseiru importante sira husi Governu, emprezáriu no mós sosiedade sivíl”, hodi hakbiit ekonomia sobrevivente no vítima sira ne’ebé re-integra ona”, nia dehan.
Portantu nia dehan, kuaze vítima no sobrevivente sira mai iha Uma mahon ne’e sira ne’ebé prontu ona no deside ba sira-nia moris no hatene ona konsekuénsia katak se nia ba uma mahon sei fila fali, tanba nia keixa nia parseira durante nia moris hamutuk.
Se nia keixa nia parseiru ne’e nia konsekuénsia maka ne’e, sira sei husik malu, entaun nia deside ba hela iha uma mahon no lori prosesu ne’e ba legal.
“Nune’e kestaun maka integrasaun oinsá maka ita bele integra sira bainhira atu sira fila fali ba sira-nia komunidade hodi sai forte liután no bele hadi’a sira-nia Aan iha siklu ekonomia família nian”, Diretora ne’e afirma.
Semináriu ida ne’e sei partisipa husi reprezentante Governu, Lider komunitaria, parte Negósiu, organizasaun sosiedade sivíl, estudante universitáriu no mós feto sobrevivente no vítima violénsia bazeia ba jéneru.
1,161 total views, 6 views today
Bele hare Video Seluk :