Dili (timorpost.com) – Partidu Demokrátiku (PD) liuhusi Konsellu Movimentu Estudante Universitáriu Demokrátiku (KMEUD), realiza semináriu semanal ba Estudante Universidade no Sekundariu sira iha Dili laran ho tema “Papel Juventude iha prosesu Kombate Korrupsaun”.
Prezidente Komisaun Organizadór, Konsellu Movimentu Estudante Universitáriu Demokrátiku, Elias Filipe, hatete sira servisu hamutuk ho Partidu Demokrátiku (PD) hakarak loke semináriu ba públiku ida ne’e, tanba juventude barak maka la komprende saida maka papél juventude iha prosesu kombate korrupsaun.
“Semináriu ida ne’e atu kapasita aposta ba dalan dezenvolvimentu nasionál ho objetivu husi semináriu semanal ida ne’e atu hasae juventude sira-nia koinesimentu atu nune’e futuru hadook bele kontrola an husi korrupsaun”, nia hateten iha Salaun Partidu Demokrátiku (PD), Kolmera, Sábadu (01/10).
Entretantu Moderadór ba Semináriu, Mateus Lopo, hatete ohin loron sira realiza eventu semináriu ida ne’e ho tema Papél Juventude iha Prosesu Kombate Korrupsaun.
“Nune’e liga ba topiku ida ne’e interasante tebes, tanba sai iha públiku ita hotu akompaña kazu korrupsaun iha ita-nia rai barak”, nia afirma.
Tanba ne’e, Moderadór saliente nia sei ko’alia kona-ba topiku refere oinsá maka sira hatene kona-ba papél Juventude nian Funsaun sai hanesan akompaña kazu korrupsaun la’ós haree de’it ba sosiedade sivíl, maibé oinsá maka Estudante halo advokasia ba kazu sira ne’ebé mosu iha públiku.
Iha fatin hanesan Oradór ba semináriu, Christopher Samson, relata nia sente kontente tanba iha Juventude Estudante buluk boot ida mai hamutuk iha fatin ida ne’e atu ko’alia asuntu sira-nia papél iha luta hasoru Korrupsaun.
Tanba ne’e, nia dehan ohin nia apresia Juventude sira ne’e husu katak karik futuru oin mai sira tenke sai Juventude anti korrupsaun no sira tenke hatene sira-nia papél iha prosesu luta hasoru korrupsaun.
“Hau-nia mensajen ba Estudante sira katak Estuda no kontinua estuda ba iha Edukasaun Formal ne’ebé sira tuir iha eskola kada universidade, maibé tenke partisipa mós iha semináriu ka workshop sira, tanba matéria ne’e balun mestri sira la hanorin iha eskola, nune’e ita bele hetán bainhira partisipa iha atividade hanesan ne’e”, nia hateten.
Ikus nia hameno ba Estudante sira atu pro-aktivu iha prosesu hotu liuliu iha prosesu luta hasoru korrupsaun.
2,570 total views, 3 views today
Bele hare Video Seluk :
Subscribe to Timorpost
