Dili (Timor Post) – Food and Agriculture Organization of the United Nations (FAO), liuhusi Rajendra Aryal, nu’udar responsabilidade FAO nian ba iha Indonézia ho Timor-Leste, Kuarta (27/07), hala’o enkontru kortejia ho Prezidente Repúblika (PR), José Manuel Ramos Horta, hodi ko’alia hametin kolaborasasun ho Governu Timor-Leste.
“Ohin iha ne’e hasoru ho Prezidente Repúblika, José Ramos Horta, hanesan mós enkontru kortejia ida, ami ko’alia asuntu Agrikultura, Seguransa Alimentar Nutrisaun, no mós ko’alia kona-ba bee, atu nune’e halo nusa, para ami bele hametin liu tan kolaborasasun ho Governu Timor-Leste,” nia dehan hafoin remata enkontru ho Prezidente, iha Palásiu Prezidensiál Bairru-Pité.
Nia haktuir, iha enkontru ne’e, responsabilidade FAO, mós agradese ba Prezidente Repúblika, ba ninia lideransa iha asuntu sira, maka, seguransa Alimentar, Agrikultura, Floresta no seluk-seluk tan. No sira rua mós troka idea oinsá atu bele hametin kolaborasasaun iha area sira ne’ebé iha Timor-Leste.
“Ami mós ko’alia kona-ba, oinsá mudansa klimátika no dezastre oi-oin ne’ebé akontese iha Rai bar-barak, no mós fó impaktu ba iha Timor-Leste. Nune’e mós ko’alia kona-ba estratéjia oinsá bele serbisu hamutuk atu responde ba krize oi-oin, inklui krize ne’ebé akontese iha Rai balu, nune’e mós fó impaktu ba seguransa ai-hán nian,” nia dehan.
Enkuantu husi enkontru kortejia ne’e mós ko’alia kona-ba funu ne’ebé akontese entre Rusia ho Ukraina, ne’ebé daudaun ne’e fó impaktu teb-tebes ba nasaun barak, liuliu sira ne’ebé depende ba importasaun ai-hán.
“Daudaun Timor-Leste ladún hetan impaktu makaas, maibé nei-neik sei hetan impaktu, entaun ko’alia estratéjia oinsá Timor-Leste mellora liu tan produsaun ai-hán lokál, atu nune’e bele iha soberania ai-hán, hodi nune’e, dependénsia ba importasaun ai-hán bele menus uitoan,” nia afirma.
Alende ne’e antes remata enkontru ho Xefe Estadu, fó kedan mensajen ba responsabilidade FAO katak, Prezidente hakarak teb-tebes atu konvoka kolaborasasun ho parte sira hotu-hotu, hodi bele hadi’a ou mellora investimentu iha setor agrikultura, atu bele responde ba situasaun mal-nutrisaun.
“Prezidente nia mensajen importante maka, nia hakarak haree oinsá nasaun ne’e bele iha soberania ai-hán, no mós bele mellora nutrisaun ba populasaun, entaun Prezidente hakarak teb-tebes atu konvoka kolaborasasun ho parte sira hotu-hotu, hodi bele hadi’a ou mellora investimentu iha setor agrikultura, atu bele responde ba situasaun mal-nutrisaun,” nia hakotu.
1,852 total views, 3 views today
