DILI, (timorpost.com)— Polísia Nasionál Timor-Leste (PNTL) liuhosi Unidade Polísia Maritima (UPM), Segunda madrugada (20/11/2023) tuku 4:00, monitoriza no konsege prende evidiénsia husi Timoroan ne’ebé hala’o atividade negósiu ilísitu hanesan sigadu, Aikameli no sensor iha área Kaitehu, postu administrativu Bazartete, munisípiu Likisa.
Evidiénsia hirak ne’ebé UPM prende sasán no ka’er mós flagrante suspeitu Timoroan mane na’in rua ne’ebé halo atividade negósiu ba sasán ilízitu sira hanesan ne’e Sigaru Surya 12, Sigaru Esse, no Sigaru Marlboro mutin hamutuk kaixa ka doos 30, Ai-kameli saku lima, sensór ai nian ida, prende mós karreta sedan mutin rua ne’ebé fasilita transporta ba mai, inklui motorizada ida ne’ebé sai mata-dalan ba atividade negósiu ilegál ne’e.
“Ohin halo operasaun hodi prende sasán ilízitu sira iha área Kaiteu, Munisipiu Likisa nian, objetu ne’ebé ita konsege prende maka sigaru tipu tolu, Surya 12, Marlboro mutin no sigaru Esse totál hamutuk kaixa 30, ita mós prende Ai-kameli saku 5, makina sensor ai ida, ne’ebé tula ho karreta sedan mutin rua ho motorizada ida ne’ebé sai mata-dalan”, Komandante UPM, Superintendente Polísia, Eugénio Pereira, informa ba jornalust iha Kuartel UPM Lesidere-Dili, Segunda, (20/11/2023).
Komandante UPM ne’e hatutan, esforsu membru UPM prende sasán ilízitu sira ne’e, tanba hetan informasaun husi servisu infrasaun sekreta Polísia no UPM rasik nune’e UPM monitoriza no konsege ka’er flagrante deleitu ba suspeitu na’in rua ho evidénsia sira ne’e.
“Ida-ne’e servisu informasaun Polísia kuartel nian tantu mós seksaun informasaun UPM ne’ebé maka konjuntamente halo atividade monitorizasaun konsege hetan provas, deteta atividade ilegál sira ne’e hotu, nune’e halo operasaun konsege prende flagrante deleitu ba sasán ilegál sira ne’e”, Superintendente UMP ne’e hatete.
Nia hatutan, iha momentu operasaun husi membru UPM, mosu grupu ida tenta atu dezvia objetu ilízitu sira ne’e husi kontrolu Polísia nian, maibé esforsu servisu sekreta informasaun kontinua vizilánsia no monitoriza hodi deteta paraderu atividade negósiu ilegál sira ne’e maka konsege kaptura.
Enkuantu Objetus husi atividade ilegál, daudauk ne’e asegura ona iha Kuartel UPM, halo prosesu identifikasaun depois mak sei haruka ba parte kriminál atu kontinua investiga no prosesa ba iha Ministériu Públiku.(*)
777 total views, 18 views today
Bele hare Video Seluk :
Subscribe to Timorpost
