DILI, (timorpost.com)— Diretór Ezekutivu Luta Hamutuk, Jose Alves da Costa, hatete, relasiona ho notísia liga ba manu tolun at ne’ebe ekipa deteta iha eskola balun, maka Sosiedade Sivíl husu ba liña ministerial kompetente atu tau atensaun kontrolu ba menu merenda eskolár tanba ligadu ho saúde estudante nian.
“Ita husu para tenke kuidadu no kontrola nafatin kada loron, ekipa tenke iha fatin para halo inspesaun ba iha hahán sira ne’ebé iha, atu nune’e la bele afeta ba labarik sira nia saúde,” dehan José Alves ba jornalista sira iha nia kna’ar fatin, Kuarta (08/05).
Nia dehan, ba suplay sira ne’ebé maka hatama kualkér hahán, inklui mantolun kuandu la di’ak tenke responsabiliza, maibé depende ba kontratu sira ne’e ko’alia oinsá, se bainhira ita boot suplay hahán mai iha nee maka kualidade la di’ak, bazeia ba teste laboratóriu no bazeia ba deteta iha terenu katak la di’ak, nee sansaun nee oinsá, ida nee depende ba iha kontratu.
“Ba ha’u ne’e tenke responsabiliza, importante mak la bele taka no la bele dehan sorte mak la iha, maibé se kuandu deteta mantolun ne’e la di’ak tenke troka fila-fali, maibé akontese hela de’it tenke troka kompañia ne’ebé hatama mantolun nee, ,”akresenta nia.
Entretantu manu tolun sira nee, fornese husi Movimentu Kamponeza Timor-Leste (MOKATIL), hodi distribui ba eskola sira ne’ebé asesu ba iha merenda eskolár, hafoin iha loron 07 fulan Maiu tinan 2024, hafoin ekipa konjuntu deteta manu tolun aat no dois iha eskola Ensinu Báziku Sentrál ( EBC) Dilijénsia Manufahi.
No tuir informasaun ne’ebé ohin ita asesu katak ekipa MOKATIL rasik substitui ona manu broiler 700 hodi troka manu tolun at.
999 total views, 15 views today
Bele hare Video Seluk :