DILI (timorpost.com) – Ema ho Defisiénsia kompostu husi defisiénsia ain, liman, mata no tilun hamutuk rihun 8 mak asesu ona ba edukasaun husi eskola primária to’o nivel aniversáriu iha Timor-Leste.
“Tuir dadus ne’ebé ami iha ema ho defisiénsia hamutuk rihun ualu maka asesu ona ba edukasaun formal hahú eskola primária to’o eskola nivel universitáriu iha Timor-Leste”, informasaun ne’e hato’o husi diretór Asosiasaun Defisiénsia Timor-Leste Cesário da Silva, ba Timor Post iha nia knaar fatin UNDIL, Kinta (27/07).
Nia dehan, dadus ne’ebé sira foti iha sensu 2015-2022 husi ministériu edukasaun nian hatudu katak ema ho defisiénsia kompostu matan, tilun, ain fíziku, liman ne’ebé partisipa iha eskola maka hamutuk rihun ualu iha territóriu laran tomak.
Enkuantu, ema ho defisiénsia ne’ebé asesu ba edukasaun formal ne’e hahú iha tinan 2000-2023 ho total hamutuk rihun ualu kompostu husi feto no mane kompostu husi nivel nasionál to’o iha nivel area rejionál.
Maibé nia preokupa kona ba fasilidade iha eskola balun seidauk bele responde ba nesesidade ema ho defisiénsia hodi bele responde ba sira hodi partisipa iha prosesu aprendizajen la’o iha sala laran ho di’ak.
Aleinde ne’e mós, diretór ne’e preokupa, kona ba profesór ne’ebé tuir formasaun oi-oin hodi hanorin ema ho defisiénsia matan no defisiénsia tilun ladún hanorin maluk defisiénsia sira ho di’ak entaun sai difikuldade boot.
Maibé problema hirak ne’e nunka impede ema ho defisiénsia sira nia vontade tanba sira konsidera katak setór edukasaun ne’e importante tebes la fihir ba kondisaun fíziku maibé, depende ba ema ida-idak nia vontade no esforsu maka bele atinje objetivu iha futuru.
Iha sorin seluk, defisiénsia matan Idalina Soares da Silva, informa sira aprende letra bawler hodi asesu ba iha eskola primária to’o eskola sekundária maibé difikuldade ne’ebé sira hasoru maka eskola balun seidauk iha fasilidade kompletu hodi fasilita sira partisipa másimu iha prosesu aprendizajen la’o di’ak.
“Ida ne’e ami hasoru hanesan difikuldade maibé la sai kestaun ba ami koko esforsu an hodi partisipa másimu iha setór edukasaun ne’e importante ba ema hotu atu bele partisipa másimu maibé, depende ba ema ida-idak nia vontade hodi bele atinje nia objetivu”, nia hakotu.
2,577 total views, 3 views today
Bele hare Video Seluk :
Subscribe to Timorpost
