DILI (timorpost.com)—Ministériu Edukasaun (ME), hamutuk ho Ministériu Juventude Arte no Kultura (MJDAK), realiza semináriu ho tema “Integrasaun Tais ba Kurikulu Eskolar 3 Siklu” no sai hanesan kurríkulu ba prosesu apredijazem iha eskola terseiru siklu.
Ministra Edukasaun (ME), Dulce de Jesus haktuir, tais tama ona iha kurrikulár eskolár terseiru siklu no oinsá mak bele implementa ba futuru jerasaun sira bele koñese tais nu’udar identidade própriu Timor-Leste nian.
“Ita iha dixiplina arte no kultura ho oportunidade ida ne’e ita enkaixe livru kataloga tais ba iha kurríkulu eskolár sira. Atu nune’e bele sai ona matéria ba edukasaun ensinu terseiru siklu sira. Tanba Soru tais ne’e ita nia bei-ala sira maka husik hela mai ita maibé agora daudauk ema soru tais menus ona”. Haktuir Ministra Edukasaun Dulce de Jesus ba jornalista sira iha Salaun Lan Martin INFORDEPE, Segunda (29/04).
Husi ne’e estudante sira la’ós aprende de’it ba oinsá atu soru tais maibé oin nusa mak estudante sira bele aprende kona-ba tais ne’e rasik husi kabas.
“Ita kores oinsá forma nia motif ne’e la’ós ema ida ne’ebé ideas no talentu ba ida ne’e entaun ita lakohi talentu ita lakon iha ita nia jerasaun, tanba ne’e ita presiza introdús iha eskola bele aprende.” Ministra haktuir.
Iha fatin hanesan, Ministru Juventude Arte no Kultura (MJDAK), Nelyo Isac Sarmento haktuir, Governu antes ne’e forma ona komisaun ida servisu espesiál hare kona-ba valor tais iha territóriu nasionál atu bele hatene motif úniku kada munisípiu sira.
“Ita hetan rekoñesimentu husi UNESCO hanesan patrimóniu mundiál ba ita nia nasaun, no agora ita sai patrimóniu ita tenke preserve ne’e maka ME nia hanoin tenke integra bele sai hanesan matéria edukasaun ba estudante sira bele koñese kona-ba tais sira, no hatene oinsá produsaun ho razaun sira ne’e hotu mak ME hakarak enkaixe iha kurríkulu hodi ajuda jerasaun foun sira kona ba tais Timor”. Dehan Ministru Nelyo.
945 total views, 12 views today
Bele hare Video Seluk :
Subscribe to Timorpost
