Dili (Timor Post)- Ministru Ensinu Superior, Siensia no kultura (MESSK), Longuinhos do Santos, ne’ebé Partisipa iha serimónia graduasaun ba Estudante finanlista Universidade Oriental Timor Lorosa’e (UNITAL), enkoraja sira atu kontinua nafatin kualidade akadémika.
“Ha’u-nia intervensaun ho hato’o ksolok-wa’in tomak ba finalista sira, iha perkursu ne’ebé ita boot sira sei hala’o, no ha’u hakarak apela ka enkoraja UNITAL atu kontinua nafatin hadi’ak kualidade akadémika iha instituisaun ida-ne’e, no ha’u garante ba futuru Timor-Leste ida di’ak liu Kualidade Edukasaun mak Futuru ba Nasaun”, Nia diskursu iha UNITAL, Sesta (15/07).
Portantu nia hakarak husu ba graduadu sira katak, importante sira kaer metin nafatin objetivu atu sai traballadór ka servisu nain ne’ebé kompetente no sai mós sidadaun ne’ebé ativu no disponivel atu kontribui atu hadi’a sosiedade, tanba ne’e sira hatene katak, ohin loron instituisaun barak hanesan empreza, organizasaun governamental ka naun governamental sira valoriza no promove tebes ema ne’ebé dedika-an no gosta aprende, ho razaun ida-ne’e, sira tenke pro-ativu iha sira-nia dalan hafoin sai husi universidade ne’e no hatudu ba sosiedade katak sira iha kbiit di’ak tebes, ne’ebé aprende no hetan ona husi instituisaun ida ne’e.
“Ita-nia povu iha esperansa no fiar ho fuan laran tomak, katak loron ida sei hetan futuru di’ak no ita tenke transforma esperansa fiar ne’e sai fonte inspirasaun ba ema hotu, ida ne’e hanesan fonte inspirasaun ba ema hotu, liu-liu ba estudante sira iha universidade ida ne’e, Governu rasik, Dosente no funsionáriu sira iha UNITAL, tanba bele kria ona kondisaun pedagojika, administrativa no lojistika ba estudante sira ne’ebé ohin halo graduasaun remata kursu ho susesu”, nia Informa.
Portantu nia hakarak hato’o ninia felisitasaun ba finalista sira-nia família, tanba nia hatene katak família nia apoiu nu’udar elementu fundamental ba susesu eskolár, husi estudante sira ne’ebé frekuenta ensinu superior iha instituisaun sira, iha estudante sira ne’e ida-idak nia kabas, iha hela mehi hosi família ne’ebé hakarak haree atu loron ida ninia oan mane ka feto ida hetan susesu. ho razaun ne’e maka, família halo esforsu maximu atu kondisaun atu manan dezafiu no bele ramata sira-nia formasaun.
“Ha’u hakarak konfirma ba ita-boot sira, katak Governu sei kontinua halo kooperasaun ida onestu, leal, solidariu ho instituisaun ensinu superior sira hotu, inklui UNITAL, atu hadi’ak kualiade iha proesu aprendizajen. Tanba ne’e ita hotu hatene katak liuhosi hadi’ak nafatin kualidade akademika maka ita sei hetan estudante ne’ebé prepara-an didi’ak ho kompetensia hodi enfrenta ejijensia husi merkadu kompetitivu ne’ebé sempre iha mudansa”, nia relata.
Aliende ne’e bainhira serimónia graduasaun ba estudante sira ne’ebé ohin partisipa iha-ne’e, la bele haluha katak, iha estudante sira ne’ebé la konsege remata hasoru difikuldade iha dalan-klaran, no mós tanba laiha tempu, laiha orientasaun vokasional ka sira Iaiha perfil adekuadu ba kursu ne’ebe sira foti.
“Ne’e atu dehan, soe tempu no rekursu saguati de’it, no ida ne’e triste tebes mai ita hotu, triste ba estudante sira tanba Ia atinji sira nia objetivu, triste ba universidade, ne’e hatudu katak ladun iha efisiensia interna ba ninia formasaun, no mós triste ba sosiedade tomak, ne’e hatudu katak ema kualifikadu ladun barak”, nia preokupa.
Nia afirma, iha estudante mak universidade bele existe, nune’e hot hotu tenke halo esforsu ba buat hotu hodi ikus mai estudante sira bele susesu, nia fiar katak bainhira ensinu superior buras ba oin nafatin, sei hamenus númeru estudante sira ne’ebé dezisti, abandona no laiha susesu, no mós sei lori estudante barak liutan hodi hala’o graduasaun ba sira ne’ebé dezafiu meta ba Graduasaun ba estudante sira, hanesan momentu ne’ebé importante ba kualker instituisaun akademika.
“Ha’u hakarak agradese tebes ba UNITAL, tanba fó konvite mai ha’u hodi hola parte iha serimónia ida ne’e, mak sai onra boot tebes mai ha’u, nu’udar Ministru Ensinu Superior, Siensia no Kultura (MESSK)”, nia hakotu.
1,855 total views, 3 views today
Bele hare Video Seluk :
Subscribe to Timorpost
