DILI (timorpost.com)—Eskola Ensinu Bázika Sentrál Katólika Maria Auxiladora Comoro komemora ezisténsia eskola nian ba dala-25, ne’e grasa ida.
Eskola Ensinu Bázika Sentrál Katólika Maria Auxiladora Comoro hari iha tinan 1998 iha tempu Indonesia nian ho naran Saun Pedro no tama fali iha tinan 2000 muda fali eskola refere tau naran eskola ensinu báziku Maria Auxiladora ne’ebé mai to’o ohin kompleta tinan 25 ho produs nia rekursu barak ona servisu iha fatin barak.
Diretora eskola EBS Maria Auxiladora Madre Suzana Alves hatutan, ohin eskola refere komemora aniversáriu ba dala 25 partisipa másimu husi padre madre husi kongregasaun oi-oin no inan aman no antigus alunu no doadór sira hotu.
“Aniversáriu eskola ne’e nian ami konvida mós ministra edukasaun Dulce de Jesus Soares no reprezentante Sekretáriu Estadu Arte Kultura no diretór edukasaun munisípiu Dili no doadór sira ne’ebé apoiu fundu hodi komemora aniversáriu eskola nian”. Diretora EBS Maria Auxiladora, Madre Suzana Alves ba Timor Post iha EEBS Comoro, Sábadu (02/09).
Enkuantu tema ba komemora eskola nian maka “Selebrando a Memória, e Costuido a futuru bele dehan ita halo memória ba ita nia istória inisia nian hodi agradese ba maromak no ba ema hotu ne’ebé kontribui hodi hari eskola refere no liu husi eskola ne’e hanesan manorin ba estudante.
“Hanesan presente hodi valoriza ita nia moris hodi servisu hamutuk liu husi kolaborasaun hodi servisu labarik estudante sira iha ita nia liman liu husi edukasaun no ita mós ita hari iha futuru hodi kontinua hodi oferese edukasaun ida kualidade ba jerasaun foun sira” Diretora ne’e haktuir.
Iha fatin hanesan, Ministra Edukasaun Dulce de Jesus Soares salienta, parabeniza Eskola EBS Maria Auxiladora Comoro, ba aniversáriu ezisténsia eskola nian ba dala-25.
“Ohin ha’u mai hamutuk ho estudante, padre, madre, inan aman antigu alunu no profesór sira hodi komemora aniversáriu eskola ensinu báziku sentrál katólika Maria Auxiladora Comoro ba dala-25 tanba ne’e ha’u fó parabéns ba profesór no padre madre sira ne’ebé hari eskola ne’e hodi transforma siénsia ba estudante sira ho kualidade”, Informa ME Dulce de Jesus Soares ba, Timor Post iha EEBS Comoro.
Ministra dehan, ohin mai hare eskola ne’e kondisaun no fasilidade kompletu hodi fasilita estudante sira hodi partisipa másimu iha prosesu aprendizajen hodi nune’e bele garante kualidade edukasaun iha futuru oin mai.
Esforsu tomak madre padre sira ne’ebé hari eskola ida ne’e akumula mós profesór barak hodi hanorin estudante barak maka sai susesu iha setór hotu tanba esforsu tomak husi padre no madre sira ne’ebé dedika-an sira nian hodi fahe sira nia matenek ba estudante sira.
“Ohin ha’u hare estudante sira kreativu tebes liu husi sira nia talentu hanesan pintura dezeñu oi-oin taka iha parede eskola nian, estudante sira kanta kapás no estudante hatudu dansa kultura ida ne’e hatudu katak ba futuru katak sira bele kompete iha setór hotu-hotu”, Dulce konta
Governante ne’e husu ba, estudante sira estuda makas no hatudu dixiplina iha eskola respeita malu tanba nasaun ne’e ba oin presiza rekursu umanu ne’ebé kualidade tanba ne’e husu imi atu estuda no prepara imi nian an hodi bele kompete iha futuru.
Atu garante kualidade edukasaun iha futuru agora estudante tenke estuda makas iha lingua hotu-hotu hodi hasae imi nia koñesimentu no abilidade hodi nune’e bele kompete iha ho ema seluk.
Ikus ministra agradese, ba madre Kongregasaun Saleziana Dom Bosco ne’ebé esforsu tomak hari eskola katólika ida ne’e hodi tranzmite siénsia ba estudante durante tinan 25 nia laran espera katak ba oin eskola ne’e bele produs tan nia rekursu umanu ne’ebé kualidade di’ak hodi dezenvolve no kontribui ba rai doben Timor-Leste liu husi setór oi-oin.
Portantu komemora aniversáriu ezisténsia Eskola nian, antes ne’e hahú ho kompetisaun jogu futsal feto no mane, konkursu ba juventude ne’ebé iha kriatividade pintura nian bele mai pinta tuir saida maka imi hatene liga ba situasaun no ambiente iha Timor-Leste.
1,652 total views, 3 views today
Bele hare Video Seluk :
Subscribe to Timorpost
