DILI (timorpost.com)— Atleta Selesaun Nasionál Federasaun Atletizmu Timor Leste (FATL), Felisberto de Deus, sai primeiru lugar iha eventu Marathona Dili 2023, ne’ebé ho kategoria iha 21 kilómetru.
“Hanesan atleta nasionál ne’ebé kompete iha eventu Marathona Dili 2023, sente orgullu no privilejiu tebes tanba bele sai primeiru lugar ho ida ne’e bele hadi’a record hodi partisipa iha eventu internasionál sira,” Atleta Nasionál, Felisberto de Deus, ba Jornalista iha resintu Palasio Prezidente Nicolau Lobato Ai tarak-laran, Sábadu (02/09/2023).
Agradese ba Governu no Prezidente Repúblika ne’e halo ona eventu Marathona Dili 2023, hodi motiva tebes atleta sira.
Iha oportunidade ida ne’e, nafatin husu ba Governu liu-liu parte Ministériu Juventude Desportu no Kultura (MJDK) presiza tau atensaun ba atleta sira, atu nune’e labele hamate talentu atleta sira nian hodi nafatin ba kompete iha eventu desportu nasionál no internasionál sira.
Portantu, atleta ne’ebé partisipa iha Marathona Dili 2023 hamutuk 2.428, ne’e fahe ba kategoria medida 21 Km.
Iha eventu Marathona Dili 2023 ne’e, kategoria atleta fahe ba parte rua hanesan, Marathon jerál ho medida kilómetru 10 kompostu atleta na’in-614 no Kategoria Paralympic ema naín-28 inklui Marathon 3 kilómetru hamutuk atleta 1.643.
Atleta ne’ebé halai iha 21 kilómetru, kategoria Mane Primeiru lugar ho montante orsamentu 2.500,00 dollar amerikanu, Segundu lugar ho montante osan 2.000,00 USD no Terseiru lugar dollar amerikanu 1.500 USD.
Kategoria feto ba primeiru lugar 2.500 USD, Segundu lugar ho orsamentu 2.000 USD no terseiru lugar ho dollar amerikanu 1.500 USD.
Alende ne’e, atleta ne’ebé kompete iha Paralympic liuliu 10 kilómetru, kategoria mane Primeiru lugar ho orsamentu 1.000,00 USD, Segundu lugar 800,00 USD no Terseiru lugar 600,00 USD.
Kategoria feto ne’ebé kompete iha enjerál kilómetru 10, Primeiru lugar 1.000,00 USD, Segundu 800,00 USD no Terseiru lugar dollar amerikanu 600,00 USD.
Entretantu, atleta partisipa iha eventu Dili Marathon 2023 ne’e hosi Federasaun Atletizmu Timor Leste, atleta hosi nasaun Indonézia inklui juventude sira, ne’e hetan suporta hosi Telemor.
693 total views, 12 views today
