Timor Post (07/03/2021)— Restreiu ba kontaktu ne’ebé ekipa sira halo iha Bairro BTN-2, Tasi Tolu, Aldeia Terra Santa, Dili, konsege deteta na’in-2 pozetivu COVID-19 servisu iha administrasaun públika.
Tanba ne’e, Koordenadór Forsa-Tarefa ba Prevensaun no Mitigasaun Surtu COVID-19, Doutór Ruia Maria de Araújo informa, Sala Situasaun Sentru Integrasaun Jestaun Krize (SS CIGC sigla Portugués) koordena kedas ho autoridade seguransa hodi blokeia movimentasaun iha Aldeia Terra Santa.
“Ohin kalan sala situasaun krize koordena ona ho autoridade seguransa sira atu temporariamente blokeia lai Aldeia Terra Santa, hahú husi rate Rai Kotu ba to’o iha rohan,” Doutór Rui subliña iha konferénsia imprensa ne’ebé hala’o urjente.
Iha sala de situasaun, CCD, Rui la tempi ema na’in rua ne’ebé identifikadu servisu iha ministériu ne’ebé, maibé husu de’it ba populasaun tomak atu koopera ho autoridade sira hotu hodi fó tempu ba ekipa konjunta sira hala’o servisu.
“Sira na’in rua ne’ebé teste pozetivu hela viziñu ho kazu ida ne’ebé ita deteta iha Baukau. Husi 289 amstras ne’ebé ita foti iha bairro ne’e, na’in-2 mak pozetivu.
Rui dehan, ekipa sira kontinua halo restreiu ba kontaktu sira husi sira na’in-2.
Maske nune’e, Rui kontinua husu ba populasaun hotu iha Dili laran atu kalma iha ida-idak nia fatin, labele pániku no bainhira laiha asuntu importante iha liur lalika sai ba fatin públiku sira.
Rui dehan, aban dader sei hato’o proposta ba Konsellu Ministru atu foti desizaun kona-ba medidas ne’ebé sei foti ba Dili laran tomak.
Entretantu dadus jerál ne’ebé fó sai husi Sala Situasaun Sentru Integrasaun Jestaun Krize (SS CIGC sigla Portugués), haktuir, kazu konfirmadu foun: 3 (Na’in 1 husi Covalima relata horisik loraik, na’in-2 husi Díli relata ohin). Nune’e sura hamutuk kazu atuál hamutuk 28. (cao)
855 total views, 3 views today
Oinsa Ita nia Reaksaun iha Notisia Nee?
Bele hare Video Seluk :
Sorry, there was a YouTube error.