DILI-Autoridade Munisípiu Dili (AMD) liuhusi Diresaun Servisu Saneamentu sosa ona farda 200 hodi distribui ba funsionáriu servisu saneamentu munisípiu Dili hodi fasilita sira nia servisu iha terenu.
Diretór Servisu Saneamentu Munisípiu Dili, Hermínio Moniz Ribeiro, hatete, AMD sosa ona ekipamentu 200 hodi fahe ba pesoál saneamentu sira uza hodi halo limpeza iha terenu loron-loron nian.
“Ami sosa ona ekipamentu hamutuk 200 kompostu husi kalsa, faru, botas, rumpi, luvas, xapeu no sapatu, hodi fahe ba funsionáriu 200 uza atu fasilita no ajuda halo servisu iha terenu ho di’ak hodi asegura sira nia saúde”, Hermínio hateten ba Timor Post iha edifísiu AMD Matadouru, Sesta (28/04).
Diretór ne’e esplika, durante ne’e pesoál saneamentu sira uza farda tuan ne’ebé sosa iha tinan hirak ba kotuk, maibé farda balun ne’ebé ekipa sira uza ne’e balun naklees no balun aat ona.
“Tanba ne’e mak ami sosa farda foun hamutuk 200 hodi fahe ba funsionáriu sira iha loron 5 fulan Maiu hodi fasilita sira nia servisu iha terenu ho di’ak”, Hermínio hatutan.
Tuir Diretór ne’e, kada funsionáriu hetan kalsa 2, xapeu 2, rumpi 2, botas 2 no luvas 2 hodi uza ba servisu dasa rai no ra’ut fo’er iha dalan no edifísiu sira iha Dili, hahú iha loron Segunda to’o Sesta tuku 07:00 dadeer 17:00 lokraik.
Enkuantu, ekipamentu hirak ne’e orsamentu munisípiu Dili liuhusi aprovizionamentu hamutuk ho kompañia lokál ida hodi sosa ekipamentu hirak ne’e hodi distribui ba pesoál saneamentu munisípiu Dili nian.
1,131 total views, 3 views today
Bele hare Video Seluk :
Subscribe to Timorpost
