Aileu(timorpost.com)—Ministru Asuntu Kombatente Libertasaun Nasionál (MAKLN), Gil da Costa “Oan Soru” akompania hosi Rejiaun I to’o IV, ofisialmente lansa ona programa konfirmasaun validasaun dadus ba ema hirak mate iha funu, tanba ukun rasik-an tuir uma lisan.
Serimonia Lansamentu ofisiál ne’e, partisipa mós hosi Prezidente Konselu Kombatente Nasionál Munisípiu 13 inklui RAEOA, iha Suku Asserimou, Postu Administrativu Aileu Vila, Munisípiu Aileu, Sesta (12/04).
MAKLN, Gil da Costa “Oan Soru” liuhosi ninia intervensaun hatete momentu ida ne’e MAKLN halo lansamentu ofisiál ba dadus ne’ebé hahú rejists tuir uma lisan ida-idak iha teritóriu Timor-Leste.
“Ita mai iha Suku Asserimou, Munsipiu nian, ita lansa programa konfirmasaun validasaun dadus ba ema hirak mate iha funu, tanba ukun rasik-an tuir uma lisan, ho objetivu prinsipál maka ita rezista dadus ema ida-idak nian, ema rejistadu hanesan martires, rejistadu hanesan Kombatente Libertasaun Nasionál”, Gil da Costa “Oan Soru”, hafoin lansamentu ofisiál dadus Validasaun iha, Suku Asserimou Postu Administrativu Aileu Vila, Munisípiu Aileu Vila, Sesta (12/04).
Oan Soru, rekoñese kuandu nia la’o ba mai, sempre rona iha territóriu Timor-Leste, haree katak ema barak maka mate, maibé seidauk rejistu. Tanba ne’e iha tinan 2021, iha Oitavu Governu, momentu ne’ebá “Oan Soru” hanesan Sekretáriu Estadu no hanesan Ministru ezersísiu durante tinan rua, prepara programa hirak ne‘e iha tempu ne’ebá.
“Ita hahú lansamentu ho ninia modelu verifika ne’e oinsá, konfirma ne’e oinsá, tanba iha ita nia estetmentu sira baibain dehan, ema ne’ebé mate durante ukun rasik-an rihun atus rua lima nolu, balun dehan rihun atus tolu balun mai dehan númeru hira-hira, númeru serteza ita laiha, ita siik de’it, tanba ne’e maka, ita hamutuk iha Asserimou atu konfirma no hatete buat ne’ebé loos no lia loos”, Oan Soru hateten.
Oan Soru mós alerta ba inan aman hotu iha territóriu Timor-Leste atu atensaun katak, lansamentu validasaun ne’e laiha relasaun ho pensaun, ida ne’e ita atu sura ita nia ema hira maka mate hosi tinan 1975 to’o 1999.
“Ita atu sura ema Aileu oan rasik ne’ebé mate ba ukun rasik-an ne’e na’in hira, atu sura Ermera oan na’in hira maka mate ba ukun rasik-an ne’e, no mós Munisípiu hothotu, ita atu hatene feto, mane, ferik no katuas ,lider no la’ós lider”, nia konklui.
Governante ne’e mós rekoñese, baibain iha serimónia boot sira sempre hato’o minutu ida ba selensiu, maibé restaurasaun independensia tinan 2002 to’o ohin loron, ema hotu nunka ko’alia dehan tenke selu misa ba maluk sira mate tanba ukun-an ida ne’e.
“Iha territóriu laran tomak ita seidauk halo misa no dere sinu ba sira, dala-ruma liuhosi ita nia lia na’in sira ko’alia kona-ba nahe biti boot atu haloot kroat ida ne’e, maluk sira Timoroan tomak no Aileu oan sira, espesial iha Asserimou, iha tinan hirak liu ba kotuk ita ko’alia kona-ba deslutu Nasionál, ita Timor iha kultura, ita nia familia kuandu oho kualkér ema ida mate, ema ne’ebé hatais metan ne’e durante tinan ida hafoin nia ba sunu metan, maibé tempu ne’ebá ita la preparadu halo hanesan ne’e”, nia subliña.
Tanba ne’e maka tempu ne’ebá buat hotu la’o ladún di’ak maka agora tenke halo planu, tanba dala mós ema halo nahe biti boot hodi haloot kroat, maibé kultura Timor nian, sé la selu misa ba ema rihun atus ne’ebé mate ba ukun rasik -an ne’e, mezmu haloot ona kroat mas kroat sei nafatin no halot buat mehik sei meik nafatin.
“Serimónia lansamentu validasaun dadu ne’e sai hanesan semináriu ida, tanba ne’e Prezidente Autoridade Munisípiu Aileu, Prezidente CCNL Aileu ho Administradór Postu haat, ho suku 33 iha Aileu, signifika Nurep 33 inklui selekom hira, ha’u laiha dadus, maibé husu sira hotu atu akompaña dadus ne’ebé iha baze de dadus, hamutuk rihun atus rua tolu nolu resin tolu atus sia lima nolu resin ida, ema ne’ebé rejistadu ona imajina 233.951, hosi númeru ne’e ita konfirma hotu hira loos mak,halo funu ba objetivu ukun rasik -an no hira mak halo funu mate, maibé nia objetivu kontra ukun rasik-an, ita tenke tau iha nia fatin kulturalmente ita tenke tau atensaun,” nia adianta.
Oportunidade hanesan, reprezentante Prezidente Autoridade Munisípiu Aileu, Sekretáriu Asuntu Administrasaun no Finansas, José Vicente Vilanova, iha ninia intervensaun husu ba Xefe Suku no Administradór Postu sira, komandante eskuadra apela ba populasaun iha Aileu hodi kolabora hamutuk ho MAKLN atu nune’e bele fó dadus loloos no konkretu hodi koresponde ba Ministériu veteranus nian.
“Dadus importante tebes atu bele ajuda Ministériu Kombatente atu nune’e bele foti desizaun balun iha tempu tuir mai, bazeia ba dadus ne’ebé ita boot sira fó. Tanba ne’e husu ba populasaun hotu atu koordena ho Xefe Suku no Administradór Postu atu fó dadus kompletu katak, ida ne’e ha’u nian, ha’u nian ema nian, ema nian “Maromak nian dehan Cesar nian ,Cesar nian , Maromak nian fó Maromak nian”, nia alerta.
Partisipa iha serimónia lansamentu ofisiál validasaun dadus ne’e, marka prezensa Prezidente Autoridade Munisípiu 12, veteranus rejiaun I to’o IV, Komandante Munisípiu Aileu no Xefe Suku ,Xefe Aldeia no komunidade.
3,612 total views, 3 views today
Bele hare Video Seluk :
Subscribe to Timorpost
