(Reportajen : Amelia Babo/Editor: Mariano Martins)
Artires Josua Soares, konsidera profisaun sopir ambulánsia hanesan Liurai no Maromak segundu iha rai
tanba ajente ambulánsia iha lei propriu atu proteje bainhira kona dezastre iha terenu.
“Lori karreta ambulánsia halai tuir lei no kódigu 1-3. Evakua pasiente depende ba kazu. Sé ami halai iha kódigu númeru 1, so Maromak maka ami sees, restu husi ida ne’e ami la sees, tanba lei iha atu proteje ami bainhira ami halo ninia servisu iha terenu. Tanba ne’e ha’u konsidera katak ha’u ninia profisaun ne’e hanesan Liurai no hanesan Maromak segundu”, espresa Josua iha dada lia via telefone ho Timor Post (25/06).
Ai fuan domin husi Jose Paixão da Silva Soares no Marcia Petronela ne’e konfesa pasadu nunka mehi sai kondutór maibé ida vokasaun.
“Ha’u nunka mehi maibé ikus ha’u sai ajente ambulánsia, ha’u sente hanesan destinu, laiha mehi ne’e hanesan destinu”, haktuir alumni Institute of Business (IOB).
Kondutór ne’e rekoñese prosesu sai kondutór ambulánsia la hanesan ho prosesu sai kondutór transporte públiku no privadu.
“Atu sai ajente ambulánsia ka motorista tenke ta’es ita hanesan bee, prosesu treinamentu oi-oin”, hatutan kondutór ne’e.
Buat seluk halo ajente sira triste maka komunidade balun la komprende sira nia servisu iha terrenu, liu-liu halo evakuasaun ba pasiente covid iha situasaun pandemia.
“Iha munisípiu balun komunidade sira tuda ambulánsia, buat sira ne’e hotu ne’e ami sente triste”, hateten kondutór liña frente ne’e.
Josua mós fofoun ta’uk evakua pasiente covid-19 maibé ho ekipamentu protesaun saúde, ho regra servisu iha terenu nia sente baibain ona.
Jerasaun Baukau apresia buat hotu la’o di’ak so komunidade balun seidauk iha konxiénsia maibé la sai kestaun.
“Ida ne’e la sai kestaun ba ami ninia servisu tanba ami hadomi nafatin ami ninia profisaun ka knar ne’ebé ami hili”, hatutan joven idade 26.
Maski nune’e nia dehan oras komunidade barak iha ona konxiénsia. “Tama iha estadu emerjénsia primeiru mai to’o ohin loron maluk barak komprende ona ami ninia papél no funsaun”, rekoñese ajente.
Nia sente difisil maka fahe tempu ho família. “Tuir regra katak loron 14 ami iha izolamentu depois ba kuarentena, depois teste swap negativu foin fila ba família, entaun susar tebes hamutuk ho família maibé la sai kestaun, tanba ita hili profisaun ajente ambulánsia hodi salva ema ninia vida”, informa tan.
Iha nivel estudante Jossua hahú nia estudu primeiru iha eskola primária Sao Domingos Savio Baukau (2002-2008), Pre- sekundáriu no Sekundáriu iha Koléjiu Paulo VI tinan 2015 no termina ensinu superior iha institute of Business iha tinan 2020.
(Lee Notisia Seluk Iha Jornal Timor Post)
916 total views, 3 views today
Bele hare Video Seluk :