Reflexaun badak ba Domingo III tempo Paskua nian. At. 3, 13-15. 17-19; Sal. 4; 1Jo. 2, 1-5; Lc. 24, 35-48)
Luis Pereira SJ
Kontexto!
Ita tama ona ba Domingo III tempo paskua nian. Liturjia domingo ida ne’e, aprezenta ba ita sasin sira konaba hasoru malu ho Jesus-Kristo Moris Hias ho nia discipulo sira. Hanesan ita hatene katak discipulo sira halibur malu iha situasaun tauk no konfuzaun nian. Iha momento hanesan ne’e, mak Jesus-Kristo Moris Hias mosu/revela-an ba sira, oferese ba sira lia fuan: paz no korazem.
Nuné, ita reflete konaba prezensa Jesus Kristo Moris Hias nian iha ita let. Hanesan Jesus-Kristo mosu/revela ninia-an ba discipulo sira, iha dalan ba Emaus. Nuné, mós, Nia mosu/revela nia-an ba ita iha momento sira ordinaria, incerteza, duvida iha ita nia dalan fiar nian, iha ita nia moris lor-loron, atu ita bele metin iha fiar no esperansa.
Ponto 3 ita bele reflete hamutuk:
Hasoru malu ho Jesus!
Henesan discipulo sira, iha ita nia moris lor-loron nian, ho ita nia serbisu sira, iha ita nia preokupasaun sira, Jesus mai hasoru ita pessoalmente. Nia konvida ita ba rekonhese nia prezensa no rona nia lian:paz hela ho imi. Ita preciza husik nia tama iha ita nia-an, atu nia loke ita nia hanoin, atu ita bele haré buat hotu foun fali iha Nia. Nia bolu ita atu soe ita nia dai ba liman lós; Nia bolu ita atu konversa ho Nia, koalia konaba saida mak akontese ho ita nia moris; tur no han no Nia. Nia bolu ita ba konfia iha ninia grasa ne’ebé abundante no lao tuir Nia ho korazem no fiar. Nia mak Maromak ida ne’ebé laós dók husi ita. Maibé, Salvador ida ne’ebé, lao ho ita iha ita nia dalan ksolok no terus sira moris nian. Nuné, importante tebes ba ita atu hasoru malu ho Jesus-Kristo pessoalmente. Husi enkontro pessoal ne’e mak moris mai fiar, esperansa no karidade.
Besik ba Eukarista!
Iha Emaus, ita hatene katak discipulo sira só rekonhese Jesus Moris Hias, wainhira sira han iha meza no Nia silu fahe paun. Iha Eukaristia, Jesus oferese nia-an rasik ba ita hanesan paun no tua moris nian. Nia fo kbít ba ita isin no klamar liu husi ninia fuar isin no ran. Nuné, ita simu Nia iha komunhaun, ita bele iha kbít atu fo sasin konaba nia domin no fahe nia ksolok no paz evanjelho nian ba ema se deit mak ita hasoru. Tamba ne’e, Eukaristia mak fatin ita hasoru malu/enkontro lolós ho Jesus. Nuné, hakbesik-an ba Eukaristia: mesa domin nian.
Fo Sasin Kristo Moris Hias!
Leitura dahuluk husi Livro Apostolo sira nia hahalok no leitura daruak husi São João nia surat haktuir oinsa Apostolo sira liu tiha hasoru malu ho Jesus Moris Hias, sira sai ba fatin oi-oin hodi haklaken Lia-Foun Diak Kristo Moris Hias no Lia-Foun Diak Salvasaun ba ema hot-hotu. Sira hetan animo, brani, aumenta iha fiar, esperansa no karidade. Sira kontinua lori ksolok no esperansa ba ema hotu liu husi lia-fuan no hahalok. Ita mós, simu konvite ida ne’e, atu sai sasin Kristo Moris Hias nian ba ita nia maun-alin sira. Mai ita lori Jesus ba ema seluk no lori ema seluk ba Jesus.
Ita reza husu grasa atu ita bele haré, rekonhese, kaer Jesus-Kristo Moris Hias nia kanek sira, esperiensia Ninia prezensa iha ita nia let li-liu iha Eukaristia no responde generosamente ba nia bolu. Atu ita bele sai hanesan discipulo sira ne’ebé liu tiha rekonhese Jesus, husik buat hotu atu lao tuir nia. Atu ita nia fuan bele manas liu tan, iha ita nia lao dalan ho nia núdar discipulo/a no haklaken ho ksolok Lia-Foun Diak Salvasaun nian ba maun-alin sira. Nuné mai ita husu grasa hodi hananu ho salmista:”Naí hatudu ita oin naroman mai ami”. Amen. Amdg!(lupersj)
(Hakerek nain Jesuita, hela iha Monserrat-Kasait, Liquiçá no Full-time lecturer iha Instituto São João de Brito (ISJB), Kasait-Liquiçá!)
1,452 total views, 6 views today
Bele hare Video Seluk :
Subscribe to Timorpost
