DILI, (timorpost.com) — Kazu kofrontu iha Lourba ho Karabau ne’ebé akontese iha loron 03 fulan-Novembru tinan 2023, Polísia Nasionál Timor-Leste (PNTL), ka’er no detein ona suspeitu na’in 16 hodi prosesa ba Tribunál Distritu Kovalima.
“Ita identifika autór ba iha konflitu ne’e, ha’u hanoin foin lalais loron hirak liu ba Komandu Jerál fó apoiu ba Komandu Munisípiu Bobonaru, ita detein ona suspeitu na’in 16”, Komandante Operasionál Interiña Komandu Jerál PNTL, Superintendente Xefe Polísia Natércia Eufrázia Martins, informa ba Timor Post, hafoin halo reuniaun avialiasaun ho komandu munisipu no unidade sira iha Kuartél Jerál PNTL Kaikoli, Kuarta, (22/11/2023).
Komandante Operasionál Interiña Komandu Jerál PNTL ne’e hatutan, hafoin operasaun konjuntu ne’e PNTL halo prosesu investigasaun submete ba Ministériu Públiku munisípiu Bobonaru hodi kontinua prosesa ba Tribunál Distritál Kovalima, deside entre na’in 16, na’in tolu maka hetan prizaun preventiva, na’in 13 maka hetan Termu Identidade Residensiál (TIR).
“Primeiru interogatóriu husi suspeitu na’in 16 ne’ebé maka ita aprezenta ba Tribunál Distritál Suai iha na’in 3 maka hetan prizaun preventiva, sira seluk hetan TIR”, Komandante Operasaun Interina, hatete.
Tuir informasaun, komandu operasaun konjunta buka tuir suspeitu kazu Lourba ho Karabau ne’e na’in 19 mak iha lista, maibé konsege kaptura ona na’in 16, nune’e komandu operasaun sei kontinua buka tuir autór sira seluk.
“Sim, husi sira na’in hirak ne’ebé ita identifika, sei deskobre tan autór sira seluk, no sei hasai mandadu detensaun para atu bele foti hotu sira para atu responsabiliza sira-nia aktu krime ne’ebé sira halo”, Superintendente Xefe Polísia ne’e esplika.
Nia hatutan vítima sira ne’ebé ka’er iha konfrontu ne’e ninia kauza tanba tuda malu, kauza seluk maka atuasaun membru polísia bainhira halo prevensaun ba problema ne’e mós halo kanek, maibé to’o agora komandu seidauk simu informasaun ruma husi vítima sira ne’ebé kanek iha konfrontu ne’e, tanba ne’e komandu husu ba vítima sira tenke aprezenta keixa ba komandu para loke prosesu investigasaun.
“Ha’u hanoin sira sai vítima, ita la dehan sira vítima ou suspeitu, maibé polísia ne’e ninia alvu maka suspeitu, maibé see karik sira sai vítima, sira tenke aprezenta sira nia-an para hodi prosesa ka, ita Komandu Jerál seidauk simu relatóriu ruma kona-ba ida-ne’e”, nia hakotu.(*)
984 total views, 3 views today
Bele hare Video Seluk :
Subscribe to Timorpost
