DILI (timorpost.com) -Autoridade Munisípiu Dili (AMD) liuhusi servisu água saneamentu daudaun ne’e prepara ona karreta bee moos tanke haat hodi rega ai-funan iha jardín sira iha Dili laran.
“Ami prepara karreta bee moos tanke haat hodi rega ai-funan iha jardín sira iha Dili laran, hahú iha jardín rotunda Nicolau nian to’o iha jardín Largo Lesidere, jardín Habibie, jardín Motaél no jardín area Delta no Elemloi nian,” xefe departamentu água no saneamentu munisípiu Dili, Domingos dos Santos Sariano, hateten ba Timor Post iha nia servisu fatin Matadouru, Tersa (02/05).
Nia dehan, karreta haat ne’e la’ós atu rega ai-funan de’it, maibé rega mós ho ai-oan sira ne’ebé kuda iha dalan públiku, ne’ebé balun tahan monu hotu ona no balun mate ona rega fali bee atu nune’e bele moris fali hodi halo sidade Dili sai matak.
Tuir xefe departamentu ne’e katak, semana ida pesoál saneamentu sira rega ai-funan no ai-oan dala rua atu nune’e loron bele manas mós ai-funan nafatin fresku no labele mate.
Nia dehan, ai-funan no ai-oan iha parte Timor Plaza nian sa’e mai to’o iha Delta foin daudauk ne’e loron manas maka’as ai-funan no ai-oan barak mak mate hotu, tanba karreta enxe bee moos atu ba rega ai-funan hirak ne’e kondisaun aat, maibé halo ona manutensaun no agora di’ak fali ona.
“Ami haruka karreta enxe bee moos tanke haat lori ba rega ai-fuan iha area parte Komoro nian mai to’o iha Palasiu Prezidente, depois kontinua fali rega ai-funan iha jardín sira seluk hodi nune’e ai-funan labele mate no labele namlele”, nia esplika.
Nia dehan, ai-funan no ai-oan hirak ne’e presiza rega atu nune’e labele namlele hodi buras no matak nafatin atu hafutar sidade Dili sai matak iha ema hotu nia matan.
2,163 total views, 6 views today
Bele hare Video Seluk :