DILI, (timorpost.com) — Kazu tiru Joven iha suku Gariuai, munisípiu Bauku, ne’ebé deskonfia pesoal intelijénsia forsa armada maka tiru, Komandu Polísia Nasionál Timor-Leste (PNTL) munisípiu Baukau halo ona investigasaun no entrega ona ba Ministériu Públiku (MP).
“Kazu tiru joven iha Gariuai, Munisípiu Baukau, deskonfia membru Forsa Armada tiru ne’e, ne’e ha’u hanoin la’ós komandu la orienta halo invetigasaun, lae?, prosesu investigasaun la’o ona entrega ona ba Ministeriu Públiku”,Komandante Operasionál Interiña Komandu Jerál PNTL, Superintendente Xefe Polísia Natércia Eufrázia Martins, informa ba Timor Post, hafoin halo reuniaun avialiasaun ho komandu munisipu no unidade sira iha Kuartél Jerál PNTL Kaikoli, Kuarta, (22/11/2023).
Komandante Operasaun Interiña ne’e hatete, informasaun kona-ba Komandu PNTL munisípiu Baukau la halo investigasaun ba kazu iha Gariuai ne’e laloos, tanba bainhira mosu akontesimentu ne’ebé indísiu krime ne’e PNTL sempre loke prosesu investigasaun ba autór sira.
“Ha’u hanoin la’ós komandu la orienta halo investigasaun, lae?, prosesu ne’e bainhira mosu akontesimentu ida maka iha indísiu krime sempre iha prosesu ba sira. Ohin relatoriu husi komandante Munisípiu Baukau katak, kazu sira ne’ebé akontese iha Baukau inklui deskonfia membru Forsa armada tiru joven ne’e iha ona prosesu entrega ona ba Ministeriu Públiku, ne’ebé ita hein ninia kontinuasaun”,nia hatete.
Ba kazu ne’e, liuhosi reuniaun avialiasaun ho komandu munisipu no unidade sira iha Kuartél Jerál PNTL Kaikoli ne’e Komandu PNTL munisípiu Baukau relata ona ba Komandu Jerál katak kazu tiru iha Gariuai entrega ona ba Ministériu Públiku no hein kontinuasaun.
Entretantu vítima Antoneto Sarmento hetan tiru husi pesoál intelijénsia iha loron 13 fulan-Novembru 2023 iha suku Gariuai, postu administrasaun Baukau Vila, munisípiu Baukau.(*)
2,865 total views, 3 views today
Bele hare Video Seluk :