DILI (timorpost.com) – Komandu Polisia Nasionál Timor-Leste (PNTL), liuhusi Tránzitu Munisípiu Dili, iha fulan Setembru, prende evidénsia motor ho karreta hamutuk 472 no motorizada Governu nian lima.
Komandante Tránzitu Munisípiu Dili, Inspetór Domingos Sarmento Gama, hato’o kestaun ne’e ba jornalista sira iha nia knaar fatin Kaikoli Dili, Segunda (03/10).
“Iha fulan Setembru ita halo pasa revista, ita konsege prende evidénsia karreta ho motor total hamutuk 472 ho motorizada Governu nian hamutuk lima,” nia dehan.
Nia dehan, evidénsia sira ne’ebé sira parte prende ne’e, tanba laiha asesores, laiha kapasete no laiha xapa matríkula no seluk-seluk tan.
“Motor Governu lima ne’ebé sira parte prende ne’e mós envolve iha infrasaun iha fulan Setembru nian, karreta Governu laiha,” nia hateten.
Komandante Tránzitu ne’e, hatete evidénsia ne’ebé sira prende ne’e, kuaze motor privadu mak barak, karreta privadu hamutuk iha 17, mikrolete 29, karreta taxi ida no truck rua.
“Evidénsia ne’ebé ita prende hamutuk 477, rezultadu mak ita hatama koima hamutuk rihun ruanulu resin neen, atus sia, hitunulu-resin ualu (26.978),” nia dehan.
Alende ne’e nia dehan, estasionamentu iha Dili ne’e loron-loron sira halo hela operasaun hodi prende no pasa multa ba sira, maibé sidadaun sira mak laiha konxiénsia, entaun nia konsekuénsia estasionamentu ilegál sira mós sei barak,” dehan Gama.
“Estasionamentu ilegál mak hanesan viola sinais, ita-nia sidadaun sira la respeitu no la kumpre halo nafatin violasaun ba sinais tránzitu sira, ne’ebé koloka iha Dili,” nia salienta.
Nia dehan, husi violasaun hirak ne’ebé motorista sira hamosu mak engarrafamentu makas iha Dili.
“Ita husu nafatin ba sidadaun sira, atu koopera ho estadu no koopera ho autoridade seguransa sira hodi respeitu sinais sira ne’e,” nia dehan.
Tanba, iha Dili ne’e, kapitál nasaun ida, se sidadaun konxiénsia laiha no la kolabora, ha’u hanoin difisil tebes atu resolve ba iha parte engarrafamentu ne’e.
1,810 total views, 3 views today
Bele hare Video Seluk :
Subscribe to Timorpost
