DILI – Komisaun Reguladór Arte Marsiál (KRAM), kontinua halo refiskalizasaun ba fatin treinamentu ka ‘ranting’ Grupu Arte Marsiál (GAM), sira nian iha munisípiu Dili, tanba ne’e, ekipa kontinua la’o hodi foti relatóriu nune’e sei entrega ba Konsellu Ministru hodi avalia.
“Ita-nia ekipa agora daudauk kontinua tama sai postu, suku ba to’o aldeia sira hodi identifika fatin treinamentu sira hodi foti sira-nia dadus, no rezultadu sei entrega ba Konsellu Ministru mak sei avalia hodi foti desizaun”, dehan Prezidente KRAM, Octávio da Conceição, iha Lesidere, Segunda, (05/02).
Tanba ne’e, Prezidente KRAM husu ba treinadór sira kada arte marsiál iha fatin treinamentu kontinua mantein iha sira-nia fatin nune’e ekipa KRAM ba sira-nia fatin karik bele fó informasaun no dadus kompletu. Maoria fatin treinamentu iha munisípiu Dili, ekipa tama hotu ona halo refiskalizasaun no balun seidauk nune’e ekipa kada loron kontinua tun tereñu hodi halo fiskalizasaun.
“Ita tama ona fatin barak maibé balun seidauk entaun ita kontinua halo fiskalizasaun, no iha tempu badak ita sei termina mak sei fó fali informasaun kompletu, agora ita-nia atividade fiskalizasaun seidauk remata”, dehan nia.
Atividade refiskalizasaun ne’e ba GAM tolu ne’ebé Governu deside halo suspensaun provizóriu, ne’e mak hanesan Persaudaraan Setia Hati Terate (PSHT), Ikatan Keluarga Silat Putra Timor-Leste (IKS-PTL), no Kmanek Oan Rai Klaran (KORK).
Entaun refiskalizasaun ne’e halo hodi akumula hotu dadus no informasaun hotu hodi entrega ba ministru lori ba Konsellu Ministru para bele foti desizaun atu loke fali ka kontinua suspende.
Ekipa ne’ebé tun halo refiskalizasaun ne’e kompostu husi Ministériu Juventude Desportu Arte no Kultura (MJDAK), Polísia Nasionál Timor-Leste (PNTL), no ekipa relevante sira inklui ho KRAM rasik no mós autoridade lokál.(*)
4,266 total views, 3 views today
![Like](https://timorpost.com/wp-content/plugins/36/public/assets/img/reactions/like.gif)
![Love](https://timorpost.com/wp-content/plugins/36/public/assets/img/reactions/love.gif)
![Haha](https://timorpost.com/wp-content/plugins/36/public/assets/img/reactions/haha.gif)
![Wow](https://timorpost.com/wp-content/plugins/36/public/assets/img/reactions/wow.gif)
![Sad](https://timorpost.com/wp-content/plugins/36/public/assets/img/reactions/sad.gif)
![Angry](https://timorpost.com/wp-content/plugins/36/public/assets/img/reactions/angry.gif)
![KRAM Kontinua Refiskaliza Ranting GAM Iha Dili](https://timorpost.com/wp-content/uploads/2022/09/KRAM.jpg)
Bele hare Video Seluk :
![loading](https://timorpost.com/wp-content/plugins/ytuples/images/gallery-page-loader.gif)
![play](https://timorpost.com/wp-content/plugins/ytuples/images/playhover.png)
![play](https://timorpost.com/wp-content/plugins/ytuples/images/playhover.png)
![play](https://timorpost.com/wp-content/plugins/ytuples/images/playhover.png)
![loading](https://timorpost.com/wp-content/plugins/ytuples/images/gallery-page-loader.gif)