DILI, (timorpost.com)– Akademista husi Universidade Dili (UNDIL), Hugo Lorenço, konkorda Governu liuhosi Ministériu Juventude Desportu, Arte no Kultura (MJDAK) hapara osamentu ba Grupu Arte Marsiál (GAM), tanba laiha vantajen ba povu.
“Ami hanoin, di’ak liu hapara osamentu ba sira, Governu apoiu fundu ba Grupu Arte Marsiál maibé ita haree katak grupu hanesan mentalidade ba bandidu, la hatene organiza no la hatene konsolida nia membru sira”, Hugo Lorenço, informa ba Timor Post, Domingu, (11/02).
Nia hatutab, “Organizasaun ne’ebé di’ak ne’e organizasaun sai ezemplár no proteje sosiedade no proteje nasaun, agora Governu tau osan ba GAM maibé ikus mai ba atake ema no atake komunidade iha fati-fatin, ida-ne’e tau fali osan ba ida-ne’e halo saida, sa vantajen ida mak Governu hetan husi ida-ne’e, tanba osamentu ne’e osan Estadu nian no osan povu nian, di’ak liu mak taka tiha de’it arte marsiál”.
Tuir Akademista nia haree membru GAM nia hahalok la kontribui ba nasaun tanba ne’e la’os identidade kultura Timor nian, hahalok membru GAM sira-nian sobu estrutura baze kulturál, tanba ne’e, Governu hapara orsamentu ne’e di’ak liu.
Governu la hetan vantazen husi reativa GAM tanba durante ne’e membru sira hamosu konflitu hanesan iha Bobonaro inklui iha fatin seluk ne’ebé komete husi membru GAM.
Nia hatete, GAM antes ne’e Governu taka tiha maibé iha mandatu Governu Konstitusionál da-VIII reativa fali tanba ho hanoin atu manán iha eleisaun maibé laiha tanba ne’e di’ak liu taka tiha GAM.
Iha sorin seluk, jurista timoroan, José Maria Guterres, hatete, see Governu hapara osamentu ne-ebé aloka ona ba GAM bele hamosu dezentidimentu ka problema kona-ba jestaun.
“Atividade GAM ne’e sei la la’o entaun sei hamosu problema iha fatin-fatin, nune’e mós atividade ilegál hodi ba sa’e sabuk iha rai-seluk kontinua buras fali ona, tanba sira tenke ba sa’e sabuk iha Indonézia, see osan fundu aprova ba iha área ne’e hapara, entaun susar para sira halo atividade sosializasaun lei arte marsiál ka koñesimentu morál ba grupu ka elementu sei la la’o tanba osan laiha ona”, José Maria Guterres, hatete.
Tanba ne’e, nia sujere Governu presiza haree no tetu didi’ak hafoin bele hapara osan ba GAM tanba osan ne’ebé Governu fó ne’e atu dezenvolve kapasidade no nesesidade membru sira-nian.
Membru GAM bele halo formasaun ruma di’ak ka ezersísiu ruma para bele hasa’e sira-nia kapasidade, karik Estadu presiza bele tuir eventu ruma iha nasaun seluk.(*)
3,231 total views, 3 views today
Bele hare Video Seluk :
Subscribe to Timorpost
