DILI, (timorpost.com)— Daudauk asosiasaun futeból sira iha Timor-Leste hahú fihir daudauk ona kandidatu ba Prezidente Federasaun Futeból Timor-Leste (FFTL) ne’ebé hahú publika ona sira-nia prontidaun atu kompete mak hanesan nain ba kompañia Esperansa Timor-Oan (ETO) Nilton Gusmão, ne’ebé sei kompete ho Francisco Kalbuadi Lay, atuál Vise Primeiru Ministru ba Asuntu Ekonómiku no Ministru Turizmu.
Eis jogadór klubu Cacussa, Jose Andrade ‘Eka’, hatete, kandidatu na’in rua ne’e di’ak hotu tanba iha esperiénsia, finanséiru no mundu koñese maibé bainhhira eleitu karik hatuur uluk mak pestasaun jogadór sira-nian antes hanoin to’o mundu negósiu futebool nian.
“Ha’u hanoin figura rua, Nilton ho Francisco ne’e iha osan hotu, sira-nia esperiénsia atu zere Federasaun ita laiha dúvida, mais hanesan eis jogadór ita husu, see de’it maka ba asumi kargu ne’e tenke define kedas futeból nasaun ida-ne’e hatuur uluk ba prestasaun, labele aproveita de’it para atu hetan osan subsidiu husi organizasaun futeból internasionál nian”, Eis jorgadór klube Kakusa, Eka informa ba Timor Post iha nia rezidénsia, Bekora, Domingu, (10/12/2023).
Nia hatutan, “Ha’u hanoin ita tenke iha natureza futeból rasik, ita labele hakfodak ho nasaun avansadu sira ne’ebé tama iha mundu negósiu futeból nian, ne’ebé, ha’u espera Federasaun tenke haree prosesu hirak ne’e orienta jogadór ba prestasaun lai, jogadór sira hamorin ona naran Timor-Leste liuhosi futeból, foin ita tama iha profesionál, ne’e nasaun sira seluk mós bele uza jogadór Timor ne’e hanesan knuuk negósiu futeból nian”.
Tuir nia, see de’it maka iha kongresu estra-ordinária FFTL hili tenke defini didi’ak natureza futeból nasaun ida-ne’e, tenke hatuur uluk mak prestasaun, labele utiliza futeból atu hetan de’it osan subsidiu husi organizasaun kompetente internasionál nian.
Futeból iha nasaun sira avansadu tama ona iha mundu negósiu, ne’ebé jorgadór sira husi nasaun avansadu sira la’os ona buka prestasaun maibé tama iha futeból profesionál ne’ebé ho valór ekonómiku ne’ebé maka’as. Agora Timor-Leste foin hahú dezenvolve futeból, entaun tenke defini ita-nia-an tama uluk lai iha prestasaun jogadór sira nia iha área futeból, bainhira hetan ona prestasaun iha jogu internasionál, jogadór sira koñesidu ona, hamorin naran Timor iha mundu, foin tama iha profesionál para bele hakat ona ba mundu negósiu desportu nian.
Tuir nia haree, tuir loloos kandidatu Francisco Kalbuadi Lay, ne’e asumi ona periodu hirak kedas hodi zere FFTL, no agora ne’e asumi hela Vise Primeiru Ministru no iha Ásia Futeból Clube sai vise Prezidente, ne’ebé loloos ne’e Francisco ho Nilton tenke ko’alia ba malu avansa ida de’it maka ba, mais hadi’ak federasaun ne’e hodi hatuur natureza futeból Timor nian ne’e mak importante no deskute atu halo.
Iha fatin ketak, eis jogadór Klubu AS Lero, Nelson Aguas Ximenes, prefere liu kandidatu Prezidente FFTL, Nilton Gusmão, maka bele hakat ba asumi prezidente hodi zere FFTL, tanba tuir nia, eis Prezidente FFTL, atuál Vise Primeiru Ministru, Francisco Kalbuadi Lay, durante mandatu asumi Prezidente FFTL, hatene buka osan de’it husi federasaun internasionál sira, maibé atu jere kompetisaun ida ne’ebé Nilton halo kria ona liga Amadora no agora sai Liga Futeból Timor-Leste, ne’e iha mandatu Francisco la halo ida-ne’e.
“Di’ak, asosiasaun sira hili maka Nilton Gusmão, tanba nia hatudu ona oinsá atu dezenvolve futeból nasaun ida-ne’e sai di’ak liu no prestadu iha mundu futeból, konsege zere Liga Amadora, agora tama ona Liga profesionál, mais Francisco Kalbuadi durante mandatu Prezidente FFTL buka osan maka hatene mais futeból iha rai-laran hakadak, laiha kompetisaun”, Eis Jogadór AS Lero, Nelson Aquas, hatete.
Tuir nia, bainhira Nilton maka asumi kargu Prezidente FFTL, kompetisaun iha rai laran la’o maka’as, selesaun sira iha federasaun ne’e rigorózu maka ita bele hetan bibeiru jogadór ne’ebé kualidade para atu lori Timor-Leste nia naran iha jogu internasionál sira.(*)
2,688 total views, 3 views today
Bele hare Video Seluk :
Subscribe to Timorpost
