BAUKAU (timorpost.com) –Populasaun Suku Loi-lubo, Postu Administrativu Vemase, munisípiu Baukau, hahu ona atu ezerse sira ninia direitu votu ho konxiénsia.
Iha Domingu (21/05/2023), eleitor sira hahú forma atu vota dezde tuku 07:05 dadeer hodi deside nasaun Timor-Leste ninia futuru, liuhosi Eleisaun Parlamentár.
Média Timor Post halo observasaun iha Sentru Votasaun Suku Loi-lubo, komunidade sira sente entuziazmu atu halo votasaun.
Nune’e mós ekipa husi Sekretariadu Tékniku Administrasaun Eleitorál (STAE) no Komisaun Nasionál Eleisaun (CNE), hanesan Brigada ka Prezidente Meza, Poling Staff, Fiskais husi Partidu Polítiku ida-idak no Observador Nasionál. Nune’e mós hetan Seguransa másimu husi Polisia Nasionál Timor-Leste (PNTL) liuliu Ofisiál Polísia Suku (OPS).
Molok eleitór sira forma atu ezerse sira nia votu iha oras 06:00 dadeer, ekipa komesa loke ona materiál noun sensitivu. Hakat ba tuku 07:00 loke materiál sensitivu hodi eleitor sira oferese sira ninia votu.
Materiál sensitivu hanesan, urna hamutuk tolu, buku buletin votu hamutuk 23 no kada buku ida iha folla votu hamutuk 50.
Alende ne’e mós, iha suku Loilubo iha Sentru Votasaun ida no númeru populasaun iha Suku refere hamutuk 1.001 abitante.
2,842 total views, 6 views today
Bele hare Video Seluk :
Subscribe to Timorpost
