DILI (TimorPost.Com) — Komandu Jerál Polísia Nasionál Timor-Leste (PNTL) indentifika munisípiu 4 mak sai risku ba problema mak hanesan Baukau, Bobonaru, Kovalima no Vikeke, tanba ne’e Komandu PNTL sei reforsa hodi garante páz no estabilidade iha área rísku hirak ne’e.
“Ita haree problema sira ne’e insidentál de’it, la’os permanente, ami haree insidente problema akontese iha munisípiu Kovalima, Baukau, Vikeke, ba iha Bobonaru, ne’ebé hamosu problema insidentál”, Komandante Operasaun Nasionál Komandu Jerál PNTL, Superintendente Xefe Polísia, José Soares, informa ba Timor Post hafoin partisipa lansamentu distribuisaun materiál eleisaun segundu volta iha Gráfíka Nasionál Liquintai, Lahane Orientál, Kinta,09/11/2023.
Komandante Operasaun Nasionál ne’e hatete, situsun insidentál ne’ebé mosu iha munisípiu haat ne’e komandu PNTL konsidera la’os problema permanente tanba ne’e mak sei la koloka postu seguransa iha munisípiu sira ne’e, maibé Komandu kontinua reforsa de’it servisu Ofisiál Polísia Suku ne’ebé daudauk ne’e koloka iha kada suku iha territóriu Timor laran tomak hodi halo koordenasaun di’ak ho autoridade suku no aldeia hodi evita problema insidensiál ne’ebé mosu iha munisípiu haat ne’e.
“Komandu la harii postu Polísia ba munisípiu sira ne’e, tanba ita haree iha suku-suku sira ne’e ita koloka ona ita-nia Ofisiál Polísia Suku, kada suku sira ne’e hotu maske la kobre hotu, maibé ein-prínsipiu ita koloka ona, esforsu sira-nia ho autoridade suku no aldeia halo ona maibé tenke envolve ema hotu”, Superintendente Xefe Polísia Jose, hatete.
Planu Komandu Jerál PNTL, ba kestaun seguransa ba munisípiu haat ne’e kontinua orienta membru Polísia Espesiál, no Unidade Polísia sira seluk inklui Komandu Jerál rasik prepara-an kuandu mosu problema sira ne’e bele ba apoiu seguransa iha munisípiu haat ne’e.
“Insidente balu iha munisípiu haat hodi perturba orden públiku, ita labele halo buat hotu dala ida de’it, maibé ita kategoria ida ne’ebé prioridade fó seguransa bainhira mosu insidente sei apoiu Unidade Espesial Polísia, UFP, UPF no Komandu Jerál atu apoiu seguransa iha fatin ne’ebá”, nia esplika.
Komandu PNTL sei garante estabilidade seguransa atu ema hotu bele la’o livre no sente kontente ho prosesu dezenvolvimentu ne’ebé la’o iha nasaun ida-ne’e.(*)
5,610 total views, 36 views today
Bele hare Video Seluk :