BAUKAU (timorpost.com)—Ministériu Administrasaun Estatál (MAE) liu husi Diresaun Jerál Desentralizasaun Governu Lokál planeia sei halo formasaun iha nivel munisipál iha territóriu Timor laran tomak ba xefe suku eleitu molok hala’o sira nia knar iha suku.
Diretór Jerál Desentralizasaun Governu Lokál (DJDGL), Antonio Augusto Guterres informa ne’e ba Timor Post, Tersa (28/11) hafoin remata fó tomada de pose ba xefe suku na’in Ualu ho nia konsellu suku iha Postu Administrativu Venilale.
Nia dehan, MAE nu’udar na’in ba suku liu husi Diresaun Desentralizasaun Governu Lokál no mós ba apoia diresaun nasionál administrasaun suku ne’ebé ministru rasik mak sei asina depois mak entrega termu pose ida ne’e ba xefe suku ida-idak sai hanesan dokumentu auténtiku ida iha nivel suku.
Nia esplika, governu prepara ona programa nasionál, iha dia 4 Dezembru mai sei halo formasaun iha nivel munisipál ba xefe suku sira ne’ebé eleitu.
“Ne’e hanesan kursu ida ka introdusaun ba instituisaun para bele kuda memória instituisaun estadu hodi nune’e bele komprende no entende, bele halo komunikasaun no koordenasaun ne’ebé mak di’ak entre instituisaun estadu no órgaun suku eleitu ba postu administrative”.
Nia dehan, iha fulan Janeiru ba oin, sei prepara termu referénsia ida atu rekruta pesoál na’in hat ba kada suku. Pesoál ida ba sekretariadu hodi jere administrasaun sekretariadu nian, ofisial administrativu ema ida, ofisial finansas ema ida no ofisial sosiál ema ida.
“Sira ne’e ita prepara atu promove administrasaun suku sai administrasaun ida ne’ebé forte no lejítimu hodi nune’e bele eleva servisu administrasaun suku nian durante sira nia mandatu la’o di’ak,” dehan Antonio.
Pedante iha serimónia tomada de poze ne’e DJDGL lee diskursu xefe governu Kay Rala Xanana Gusmão nian, hatete, lideransa komunitaria mak kaer knar ida sentrál tebes. Bainhira atu haforsa valor demokrátiku sira, lider komunitáriu mak hala’o funsaun hanesan intermediariu, ne’ebé esensiál entre saida mak ita nia komunidade sira hakarak atu hetan, no saida mak ita nia instituisaun sira iha governu atu hala’o. Bainhira sira fasilita diálogu ida, hato’o nesesidade hosi komunidade no promove partisipasaun sívika, iha ámbitu kada komunidade lokál nian, maka sira haforte ona aliserse hodi harii demokrasia.(#)
3,450 total views, 6 views today
Bele hare Video Seluk :
Subscribe to Timorpost
