Baukau(timorpost)—Membru Polisia Nasionál Timor Leste (PNTL) na’in 31, husi na’in-60, ne’ebé rejista ona hodi tuir juramentu iha loron 7 Dezembru 2023 hamutuk ho membru sira seluk husi fatin seluk iha Palasiu Governu, Dili.
Komandante Polisia Munisípiu Baukau, Superintendente xefe, Antoninho Mauluta hateten, lista hosi Komandu Jerál PNTL ne’ebé ke konsege identifika membru polisia hamutuk na’in 60 iha Baukau, maibé sira ne’ebé mai rejista an foin na’in-31. Enkuantu na’in-29 seidauk aprezenta an.
“Lista naran ne’ebé mak Komandu Jerál PNTL haruka mai, konsege identifika membru polisia (Baukau) hamutuk 60 maibé sira ne’ebé mai rejista an iha Komandu Munisípiu foin 31, enkuantu na’in 29 seidauk aprezenta an. Sira na’in-31 preparadu atu tuir juramentu ne’ebé sei realiza iha Palásiu Governu iha loron 7 Dezembru 2023”, Antoninho, segunda (4/12) iha salaun apuramentu Munisípiu Baukau.
Nia afirma, membru polisia sira ne’ebé mak la rejista an iha komandu Polisia Munisípiu, signifika sira lakohi halo juramentu. Tanba halo tiha juramentu, sira sei deklara an individualmente katak sei la tuir Arte Marsiál (AM) ka Arte Ritual (AR) no sira kontinua deside nudar membru PNTL. Sira ne’ebé la rejista an, konsidera hili dalan sai husi PNTL no dalan tuir nafatin AM no AR.
“Kuandu lista naran membru nian haruka mai husi nasionál iha nain 60 depois ami kontinua hato’o ba membru sira iha munisípiu no eskuadra, iha na’in 31 mak mai rejista maibé na’in 29 too agora seidauk mai. Nee signifika sira hili dalan sai husi polisia hakarak sai arte marsiál no arte ritual,” dehan Mauluta
Husi membru 31 ne’ebe rejista an, barak liu mak PSHT, Kera Sakti no KORKA iha membru ida.
Tuir planu, membru sira ne’e sei aprezenta an iha loron 6 Dezembru molok ba halo juramentu iha Dili.(#)
3,145 total views, 3 views today
Bele hare Video Seluk :
Subscribe to Timorpost
