Dili(timorpost)—Ministru Defeza, Kontra-Almirante, Donaciano Costa Gomes “Pedro Klamar Fuik” hatete iha fulan Maiu no Juñu 2024 sei halo lansamentu ba Ró patrolla ne’ebé apoiu hosi Austrália ba Komponente Naval Forsa Armada Timor-Leste.
“Australia oferese Ró patrollamentu rua, Ró rua ne’e ida sei halo lansamentu iha fulan Maiu no ida fali sei halo lansamentu iha fulan Juñu ou Jullu karik prontu ona”, Pedro Klamar Fuik, informa ba jornalista hafoin enkontru ho Ministru Defeza Austrália iha edifísiu MD Fatuhada, Tersa (30/01).
Ministru Donaciano hatete, hafoin lansa tiha ró rua ne’ebé apoiu hosi país amigu Austrália, governu Timor-Leste ho Austrália sei haree fali kestaun aportajen ba Ró sira ne’e.
“Depois lansa tiha naturalmente ke kestaun oinsá maka ró rua ne’e atu aporta ou halo aportajen, ne’e maka ami sei haree dalan ida ne’ebé maka di’ak liu atu depois buat ne’ebé maka sira fó justifikadu”,Governante ne’e hateten.
Tanba forsa armada, liuliu komponente Naval iha kbiit atu halo manutensaun, iha kbiit atu kuidadu hodi garantia konfiansa ba Austrália ne’ebé maka fó ona apoiu ba Timor-Leste.
Tuir membru Governu da-IX katak, liuhosi doasaun Austrália ne’ebé fó ró rua ba Timor-Leste, bele iha meius atu bele defende ka kontrola riku soin sira iha tasi laran.
Nia subliña, aleinde Austrália apoiu ró rua ne’e, kompleta mós ho formasaun marinir ba ró rua ne’e, oinsá maka opera ró rua ne’e, tanba ró rua ne’e modernu tebes entaun forsa marinir sira iha ona kualifikasaun atu bele opera.
Hosi akordu ne’ebé maka Governu rua ne’e konkorda iha parte tolu, ida maka fó apoiu ró rua, ida fali konstroi portu ba ró rua ne’e no ida seluk konstroi komandu Naval ba komponente Naval Forsa Armada Timor-Leste nian.
1,746 total views, 3 views today
Bele hare Video Seluk :
Subscribe to Timorpost
