DILI(TimorPost)—Prezidente KAFI, José Maria dos Reis, hatete, foin daudaun, Tribunál de Contas, haruka ona relatóriu dokumentu ba Primeiru Ministru, kona-ba setór infraestrutura dezenvolve iha Territóriu Timor-Leste, úniku iha Rejiaun Administrative Ekonomia Oekusi Ambeno (RAEOA), mak kualidade ho presu ne’ebé baratu.
“Tribunál de Contas haruka ona ninia relatóriu ba iha Governu dehan katak infraestrutura ne’ebé mak halo iha timor laran tomak, iha Oekusi mak iha kualidade di’ak ho presu ida ki’ik, ida ne’e Tribunál de Contas ninia relatóriu, ita la fó sala ba ida ne’e no ida ne’ebá,” nia dehan liuhosi Konferénsia imprensa iha ámbitu realiza semináriu Nasionál iha Auditóriu MF, Ai-tarak Laran Dili, Tersa (21/03).
Nia hatete, hahú iha I Governu konstitusionál (2002-2005) orsamentu ba mandatu tinan tolu, pur-volta 238.900.000,00 USD (duzentos e trinta e oito milhões e novecentos mil dólares americanos), ne’ebé 11% aloka ba setór infraestrutura nian. Orsamentu ba tinan primeiru hahú rekonstrusaun Estadu, mai hosi doador internasionál sira (por volta 500 USD milhões).
Iha II Governu Konstitusionál (2005-2006), hetan orsamentu jerál Estadu por volta 142,200,000.00USD, (cento e quarenta e dois milhões de dólares americanos), hafoin halo retifikasaun orsamental, ne’ebé 25% aloka ba setór infraestrutura, hamutuk 34 900 000USD (trinta e quatro milhões, novecentos mil dólares americanos).
Iha III Governu Konstitusionál (2006-2007), hetan orsamentu jerál Estadu, inklui orsamentu retifikativu, hamutuk 328.579 000.00USD (trezentos e vinte e oito milhões, quinhentos e setenta e nove mildólares), ne’ebé 34% hosi total orsamentu destina ba kapitál dezenvolvimentu.
Enkuantu iha IV Governu Konstitusionál,hosi-kedas 2008 to’o 2010, hetan orsamentu ba tinan rua, hamutuk 2USD mil milhões, ne’ebe 23% aloka ba dezenvolvimentu infraestrutura sira.
Hakat ba Iha tinan 2011 ezekutivu deside atu kria fundu espesial, liu hosi Lei (tuan) Orçamentu e Gestão Finanseira, mak hanaran Fundo das Infraestruturas, ne’ebé, to’o ohin loron, finansia projetu estratéjiku plurianual sira.
Nune’e Iha tinan 2016, Governu halo alterasaun ba lejislasaun hodi regula Fundo das Infraestruturas hosi fundu espesial ba fundu autónomo. Biar alterasaun ida ne’e, Fundo das Infraestruturas nia kompetensia no atribuisaun sira mantein nafatin.
“Ho kriasaun Fundo das Infraestruturas bele hatan ba preokupasaun sentral hosi Governu sira ba kotuk, ho mantein to’o iha Governu ida ne’e. Hodi fó atensaun espesial ba iha investimentu no implementasaun infraestruturas estratéjiku sira hodi dudu prosesu dezenvolvimentu Timor-Leste nian,” nia aprezenta.
Entretantu Komisaun Aprovizonamentu Fundu Infraestrutura (KAFI), kompostu hosi Ministériu Planu Ordenamentu, Ministériu Obras Públika, Ministériu Transporte Telekomunikasaun, no Ministériu Finansas, Ministériu hodi hola parte membru konsellu Administrasaun fundu infraestrutura, nota katak iha problema lubuk ida mak Governu ne’e hasoru iha setór infraestrutura.
2,309 total views, 3 views today
Bele hare Video Seluk :
Subscribe to Timorpost
