DILI-Populasaun iha suku Bidau Akadiru-hun, postu administrativu Na’in Feto, munisípiu Dili, hamutuk 105 mak la simu Sesta Bázika.
“Iha suku refere iha aldeia tolu komunidade barak simu ona sesta bázika, falta de’it komunidade ne’ebé foin forma família iha tinan 2021-2022 nia laran hamutuk 105 maka naran laiha lista ne’ebé haruka husi ministériu relevante mai iha suku”, xefe suku Bidaun Akadiru-Hun, Juvenál da Conceição hateten ba Timor Post iha sede suku Bidau Akadiru-hun, Tersa (21/03).
Maibé, oriente xefe aldeia tolu ne’e rekolla kartaun eleitorál, fixa família husi família foun ne’ebé naran laiha lista ne’ebé haruka mai suku ne’e hodi haruka fila fali ba iha ministériu relevante no kompañia ne’ebé hetan fiar husi governu hodi hein tempu badak bele fornese fali ai-han Sesta Bázika ba komunidade ne’ebé naran laiha bele asesu hotu.
Nia dehan, lista naran komunidade ne’ebé iha tinan 2020 simu ona sesta bázika sira nia naran haruka husi MAE ho MTCI nian mai suku naran iha entaun sira simu hotu Sesta Bázika ne’ebé oferese husi governu ba Timor laran tomak.
Komunidade hamutuk 105 ne’e foin forma família iha tinan 2021-2022 entaun sira seidauk iha fixa família entaun sira seidauk prenxe sira nia naran iha fixa família nian hodi tau iha sede.
Nia esplika, foin daudaun ne’e xefe aldeia sira lori de’it fixa família uluk simu sesta bázika iha tinan 2020 nian maka hamata iha suku hodi lori ba iha ministériu refere hodi simu Sesta Bázika.
Autoridade lokál ne’e esplika, komunidade 105 ne’e daudaun ne’e sira haruka ona naran xefe família nian ba iha ministériu refere hodi hein tempu badak bele fornese programa fase daruak nian ba komunidade ne’ebé seidauk simu Sesta Bázika ne’e atu nune’e, iha tempu badak sira bele simu hodi bele responde ba nesesidade família uma laran.
Nia dehan, iha fase distribuisaun Sesta Báziku ba komunidade iha suku refere partisipa husi PDHJ no KAK iha terenu hodi observa ba ai-han hirak ne’ebé mak merese hodi distribui ba komunidade iha suku refere.
Juvenal haktuir, kompañia ne’ebé fornese sesta báziku ba komunidade sira ne’e prenxe duni kritériu tanba ai-han hirak ne’e maioria produtu lokál ne’ebé mak povu kuda governu sosa hodi distribui fali ba komunidade liuhusi programa Sesta Bázika nian.
Enkuantu, xefe suku esplika, iha prosesu distribuisaun durante semana ida nia laran xefe suku no xefe aldeia kontrolu makas hodi hare produtu hirak ne’e fresku ka lae atu nune’e, fornese ba komunidade labele kestiona.
Maibé, realidade hatudu kompañia Timor ne’e nia produtu di’ak no prenxe duni kritériu husi governu, ikus mai komunidade sira entuziazmu no sira la halo protesta kona-ba menu ne’ebé sira simu husi kompañia tanba menu hirak di’ak.
Enkuantu, suku refere iha nia aldeia tolu, Bedik, Nuu badak, Kulu-hun de Baixu ho nia populasaun hamutuk 4324 ho nia xefe família kompostu feto no mane hamutuk 833.
937 total views, 3 views today
