BAUKAU (timorpost.com) – Governu liuhusi Ministériu Turizmu Komérsiu no Indústria (MTKI) inaugura fatin turizmu Komunitariu iha Hogabiloi, iha suku Baha Mori, postu administrativu Venilale, munisípiu Baukau.
Oitavu Governu Konstitusionál tau prioridade ba setór turizmu, tanba ne’e liuhusi orsamentu tinan 2022, ministériu apoiu orsamentu 6.800 USD ba autoridade lokál no komunidade iha postu no suku haat ne’ebé pertense ba areadores Lagoa Hogabiloi hodi dezenvolve fatin turizmu tuir kriatividade no potensiál rai ida-idak nian.
Ho nune’e, Ministru Turizmu Komérsiu no Indústria, José Lucas do Carmo da Silva, inaugura ona uma Gasebo ka fatin turizmu Komunitariu nian iha Hogabiloi.
Iha inaugurasaun ne’e, Ministru MTKI José Lucas do Carmo da Silva hatete, konseitu turizmu komunitáriu ne’e responsabilidade másimu iha komunidade, tanba kualidade mobiliza no kualidade kapasitasaun ne’e hahú husi baze.
“Konseitu Turizmu komunitáriu ne’e ita hamosu ninia espetativa liuhusi konteúdu hanesan iha kualidade kapasitasaun no kualidade mobilizasaun husi juventude sira iha baze signifika katak kualidade ne’ebé mak ita hasoru iha fatin turizmu Komunitariu sira ne’e ita hakarak juventude sira mak kaer rasik kuda talin,” nia hateten.
Governante ne’e fiar katak, turizmu komunitáriu ne’e sei iha ninia sustentável, tanba juventude sira iha interese maka’as tebes ho sira nia kriatividade.
Iha fatin hanesan, Xefe Suku Baha-Mori, Estanislau Guterres, hatete nia parte agradese ba Governu ne’ebé dezenvolve ona lagoa Hogabiloi nu’udar fatin turizmu ida ne’ebé bele fó benefísiu ba komunidade sira.
“Ha’u agradese ba Governu liuliu MTKI ne’ebé ajuda dezenvolve ona ami nia fatin ka lagoa ne’e sai fatin ne’ebé furak nune’e bele dada turista sira mai vizita fatin ne’e,” nia hateten.
Enkuantu, Ministériu Turizmu Komérsiu no Indústria harii ona gasebo ualu iha Lagoa Hogabiloi, postu administrativu Venilale, munisípiu Baukau.
Entretantu, partisipa iha Inaugurasaun ne’e kompostu hosi komunidade, estudante no partisipa mós husi Polísia Eskuadra Venilale nian.
1,098 total views, 9 views today
