DILI, (timorpost.com)—Prezidente Repúblika Jose Ramos Horta hasoru malu ho Prezidente Kámara Komérsiu Indústria Timor-Leste (CCI-TL sigla portugés), Jorge Serano husu atu CCI-TL kontribui ba estadu atu fó empregu no mós hasa’e produsaun rai laran nune’e bele responde ba sustentabilidade ekonomia iha Timor-Leste.
Prezidente CCI-TL, Jorge Serano hatete, Prezidente enkoraja atu CCI-TL kontribui ba estadu atu fó empregu no mós hasa’e produsaun rai laran nune’e bele responde ba sustentabilidade ekonomia iha Timor-Leste.
“Enkontru ho Xefe Estadu tanba hetan pedidu rasik husi PR Horta atu mai buka solusaun liga ba setór privadu no emprezáriu sira iha partisipasaun dezenvolvimentu nasionál, dezafiu saida mak emprezáriu sira hasoru, problema, progresu iha dezenvolvimentu ekonomia ligasaun setór privadu sira nian ba iha OMK, ASEAN, CPLP”. Haktuir Jorge ba jornalista sira hafoin hasoru malu ho PR iha Palásiu Prezidensiál Bairru-Pite,Tersa (16/04).
Jorge Serano haktuir, hanesan nasaun hotu-hotu preokupa ba dezafiu sira ne’ebé sai presaun iha sustentabilidade ekonómia iha ita nia rai laran.
“Ita hotu-hotu preokupa hakarak hadi’a ita nia rain ida ne’e, atu kontribui ba fó empregu atu mais motiva investimentu no hasa’e produsaun iha rai laran nune’e ita bele iha sustentabilidade ekonomia iha ita nia rai laran,” nia rekomenda.
Iha enkontru ne’e mós ko’alia dezafiu ba investimentu iha Timor Leste liga ho lejizlasaun, ba iha problema balun ne’ebé investor sira hasoru.
“Ohin ami ko’alia mós kona-ba dezafiu ba investimentu iha Timor Leste liga ho lejizlasaun, iha problema balun ne’ebé ohin Xefe Estadu ko’alia di’ak loos kona-ba polítika protesaun no mós barreira sira ne’ebé implika investor estranjeiru no mós nasionál atu bele halo investimentu, “dehan nia.
2,154 total views, 3 views today
Bele hare Video Seluk :