DILI (timorpost.com) — Governu Timor-Leste hamutuk ho Governu Japaun, hahú asina no troka nota subvensaun ba melloramentu ekipamentu redusaun no rekuperasaun risku dezastre naturais.
Dokumentu ne’e asina entre Embaixadór Japaun ba Timor-Leste ho Vise Ministru Negósiu Estranjeiru no Kooperasaun (MNEK), Julião da Silva, ho montante millaun atus 8.01 JPY.
Objetivu husi montante osan millaun atus 8.01 JPY, atu uza hodi sosa ekipamentu, inklui mákina pezadas, hanesan veíkulu bomba drenajen, eskavadora hydraulics, no baskulante, servisu konsultoria, no asisténsia relasionadu ho teknolojia.
“Programa ida ne’e atu reforsa kapasidade redusaun no rekuperasaun risku dezastre liuhosi atualizasaun no melloramentu ekipamentu konstrusaun ba manutensaun infraestrutura relasionadu ho redusaun risku dezastre hanesan estrada, kanál mota no drenajen, hodi kontribui ba hamenus resilience dezastre iha Timor-Leste,” hateten Embaixadór Japaun ba Timor-Leste, Kimura Tetsuya ba jornalista sira Salaun Nobre MNEK, Pante-Kelapa, Kinta (12/01).
Nia dehan, liuhusi projetu redús risku dezastre, sira dezeju atu fahe teknolojia, abilidade no koñesimentu ne’ebé Japaun hetan durante tinan barak nia laran hodi Timor-Leste bele sai reziliente liu tan kontra dezastre naturais ba futuru.
“Governu Japaun iha kompromisu atu kontribui ba dezenvolvimentu infraestrutura inklui redús risku dezastre ne’ebé sei lori ba moris seguru liután ba ema hotu iha Timor-Leste”, Kimura Tetsuya haktuir.
Iha fatin hanesan Ministru Obras Publika (MOP), Abel Pires, haktuir diskusaun apoiu ne’e hahú husi tinan 2021 momentu akontese dezastre Naturais lubuk ida iha rai ida ne’e.
“JICA momentu ne’ebá ajuda ona, maibé dezastre Naturais sempre akontese. Entaun iha tinan kotuk MOP rasik halo proposta ba Embaixada Japaun para oinsá sira bele apoiu tan Ekipamentu lubuk ida mai ita hodi antesipa ba risku dezastre naturais, tanba ne’e mak ohin ita lansa asina ne’e”, nia esplika.
Nia haktuir, Agora daudauk MOP iha Ekipamentu hamutuk 129 ne’ebé la’o daudauk ona. Enkuantu mákina sira ne’e iha mákina 26 Unidade kompostu husi motorlebder, vuldober, Loder, silindru dander no Toronto.
“Ita agradese ba Embaixada Japaun liuliu ba JICA ba sira-nia apoiu. Ita hein katak IGE hamutuk ho nia ekipa oinsá maka sira bele aproveita didi’ak Ekipamentu sira ne’ebé simu no depois oinsá maka servi di’ak liu tan Povu iha situasaun difisil”, Abel akresenta.
Portantu partisipasaun iha eventu kmanek ne’e, Vise Ministru Negósiu Estranjeiru no Kooperasaun (MNEK), Ministru Finansas (MF), Ministru Obras Publikas, Embaixadór Japaun iha Timor-Leste, Reprezentante JICA, Instituisaun relevante sira, no ofisial sira husi Ministériu Negósiu Estranjeiru no Kooperasaun rasik.
2,871 total views, 6 views today
Bele hare Video Seluk :
Subscribe to Timorpost
