DILI (timorpost.com) — Prezidente Konfederasaun Sindikatu Timor-Leste (KSTL), Almério Vila Nova, agradese nonu Governu konstitusionál, ne’ebé esforsu atu iha loron 120 nia laran, rezolve problema saláriu mínimu, maibé KSTL rejeita governu hasa’e salariu minimu hosi 115 ba 135 USD.
“Se governu esforsu hasa’e saláriu refere hosi 115 USD ba 135 USD, ida ne’e ami uluk kedan iha tinan kotuk mai too ohin loron ami rejeita total montante 135USD, tanba la bazeia ba peskiza, governu liuhosi Ministeriu Finansa mak tau standard mínimu ida ne’e iha lei Grande Opsaun Planu, atu iha tinan 2023 ba oin sai hanesan standard ida ba governu atu aplika, ida ne’e la’ós aplika tuir lei, maibé aplika de’it grande opsaun planu,” nia dehan ba Timor Post iha nia servisu fatin Kuluhun Dili, Sesta (11/08).
Nia hatete, haree ba esperiénsia tinan barak nia laran, governu ida mai governu ida troka, saláriu mínimu ne’e sai hanesan promesa de’it, hanesan kampaña polítika hosi na’i ulun na’in sira para atu bele hetan simpatia, maibé ikus sira tau sees tiha saláriu mínimu.
“Ami lakohi Governu halo retórika no promesa de’it, ikus mai ita haluhan tiha, ita laiha seriedade para avansa foti desizaun ba dekretu saláriu mínimu inklui valor saláriu mínimu ba traballadór iha TL”, Vila kestiona.
Nia haktuir, loos duni ema hotu hatene saláriu mínimu ne’e kestaun polítika, tanba iha ligasaun ho ekonomia, ligasaun ba kondisaun sosiál moris, se bainhira estadu ida ne’e hanoin atu iha dezenvolvimentu sosiál, la’ós de’it iha parte ekonomia entaun tenke tau iha importansia atu nune’e ema bele moris di’ak bazeia ba rendimentu ne’ebé sufisiente atu sustenta nia moris.
Tanba dezenvolvimentu sosiál ninia dalan mak tenke halo revizaun ona ba saláriu mínimu, tanba vida moris ne’e karun tebes, ho nune’e saláriu 115USD labele ona atu sustenta traballadór ho nia família nia moris durante fulan ida nia laran.
“Saláriu mínimu sai hanesan problema boot, tanba ne’e urjente ba governu Da-Sia ida urjente atu fó solusaun, nune’e hare ba família hirak ne’ebé laiha kapasidade governu presiza tenke fó subsídiu ba iha foos, tanba ne’e solusaun urjente ba governu halo revizaun ba saláriu mínimu”, nia rekomenda.
KSTL ezije ba governu tenke fó prioridade revizaun ba saláriu mínimu hosi 115USD ba 150USD, tuir proposta hosi Konsellu Nasionál do Traballu iha tinan 2020.
Antes ne’e, ezbosu lei saláriu mínimu liu ona diskusaun naruk Komisaun Nasionál Servisu (KNS), kompostu hosi CCI-TL, Sekretariadu Estadu Formasaun Profisionál no Empregu (SEFOPE) no Konfederasaun Sindikatu Timor-Leste (KSTL).
Nune’e, iha loron 28 maiu 2012, KNS ne’ebé prezide hosi SEFOPE aprova saláriu mínimu 115 USD, ne’ebé antes ne’e halo peskiza no ikus mai aplika ba Funsaun Públika no setór privadu.
Desizaun KNT tama iha vigór iha loron tuirmai hosi Lei Traballu númeru 4/2012 loron 21 fevereiru, ne’ebé tama ona iha vigór no sei hetan revizaun hafoin liu tinan-rua, maibé tanba mosu preokupasaun barak la konsege halo revizaun.
Saláriu mínimu seidauk halo revizaun durante tinan-10 ona, ne’ebé saláriu mínimu estabelese dahuluk ho montante 85 USD, hafoin halo revizaun iha tinan 2012 fixa ho 115 USD.
Governu propoin ona saláriu mínimu sa’e ba 135 USD iha Lei Grande Opsaun Planu (GOP) ne’ebé Parlamentu Nasionál aprova no Prezidente Repúblika promulga ona.
4,783 total views, 3 views today
Bele hare Video Seluk :
Subscribe to Timorpost
